Khawzawl, 16th November, 2020 : 

Khawzawl District Bawrhsap, District Election Officer ni bawk Pu Zothanmawia chuan vawiin chawhma dar 11:00 ah khan DC Office Conference Hall, Khawzawl-ah Special Summary Revision of Photo Electoral Roll, 2021 atan Draft Electoral Roll a tlangzarh. 

Khawzawl District Election Officer (DEO) Pu Zothanmawia chuan India ram chu inthlang ram kan nih avangin Election in dinhmun pawimawh tak a luah a. Inthlanna felfai kan neih theih nan Electoral Roll tha leh dik a pawimawh a. India khua leh tui kan nih anga chanvo pawimawh tak kan neih, kan aiawha ram hruatute thlang chhuak thei turin Electoral Roll-a awm thei chinte chu kan awm vek a tul a ni a ti. 

Pu Zothanmawia chuan Draft Electoral Roll-ah hian Tuichang Assembly Constituency-ah voter 16,649 an awm mek tih tarlangin, heng zinga 8,356 chu mipa an ni a, hmeichhe vote nei 8293 an awm bawk. Village Council leh NGO hrang hrang – YMA, MUP leh MHIP ten Electoral Roll ennawn chungchangah Booth Level Officer te an puih hian E-Roll a felfaiin a dik duh tih sawiin, VC leh NGO te chu thawhpuiah a sawm nghal a ni.

Pu James Lalnithanga, Electoral Registration Officer (ERO) leh SDO (Sadar) ni bawk chuan Election Commission of India atanga District level thlenga Election buatsaihtute inkhaidiat dan leh a kalphung tlangpui a sawifiah a. Tun dinhmunah Khawzawl District Election Officer chuan 22-Tuichang Assembly Constituency chauh a enkawl dawn avangin, District chhunga khaw thenkhat chu District dang DEO kutah a awm dawn tih a tarlang bawk a.  

Election Officer Pu H. Lalramenga’n Tuichang AC chhunga Polling Station thar pahnih – Khawzawl Lungvar leh Khawzawl Arro – a awm avangin Part awm zat pawh 26 atangin 28 ah a chho a, Polling Station pathum thlak niin, Khawzawl Town chhunga Part hmingte chu a veng hming lang tura thlak a nih thu a tarlang a. Final Roll tlangzarh thei tura tih ngai leh mawhphurhna nei hrang hrangte a sawifiahin, tuna Draft Roll publish chu Village Council inthlan hnuhnung bera Electoral Roll nen hriatpawlh lo turin kalkhawmte a chah bawk. 

Vawiina Electoral Draft Roll tlangzarhna-ah hian Khawzawl Joint VC, Khawzawl Group YMA, MUP, MHIP Sub-Headquarter aiawhte bakah political party pahnih – INC leh MNF - aiawhte an tel a ni.


Written by H. Lalramenga, SDC, Khawzawl District