Khawzawl, the 3rd September, 2021:
Vawiin khan Pu C.C. Lalchhuangkima, Deputy Commissioner, Khawzawl District chuan Khawzawl District chhung Community Covid Care Centre (4C) leh Covid Care Centre (3C)-a hman tur bungrua, Chief Minister’s Relief Fund (CMRF) atanga lei a sem chhuak.
Chief Minister's Relief Fund atanga lei hmanraw chi hrang hrang semchuahna hun, Khawzawl District Hospital-a neihah hian Khawzawl DC Pu C.C. Lalchhuangkima chuan thu sawiin, hun rei tak chhung Covid 19 hri kai nei mumal lovin kan awm a, hmun thenkhatah sikul leh biakin te pawh hawn a ni a, tunhnai karkhat chhung vela Khawzawl district-a hrileng hmuh chhuah an pung ta chu beisei loh thil a ni, a ti a. Covid 19 hri leng mek chu thih leh dam inkar a ni tawh a, thihna a thlen lohna turin pawl leh mimal tinte tanrual a, theihtawp kan chhuah a ngai a ni, a ti bawk.
Pu Lalrohlua, Additional Deputy Commissioner kaihhruai programme-ah hian Khawzawl District Bawrhsap chuan sawi zawmin, hrileng chhuchat tura hmalakna kawngah District thuneitute ruahmanna chu a tha ber leh dik ber a ni kher lo thei a, inlungrual taka kan thawhho a ngai thung a ni tiin mass testing kalpui mek pawh hri leng dangchat tura kan dinhmun chiang taka hriat a tul vang a ni, a ti a. Mass testing kalpui mekah mipuiin in test an hreh lo chu lawmawm a tih thu a sawi bawk a ni. Hrileng mek hi state lian zawk leh ram lian leh hausa zawkte pawhin an buaipui em em a nih avangin hrileng khuahkhirh tura tan lak a ngai a ni a ti bawk.
Khawzawl District Bawrhsap hian 3C leh 4C a hman tur hmanrua chi hrang hrangte chu 3C leh 4C awmna hmuna Medical Officer leh VLTF aiawh lo kalte hnenah a hlan a. 4C tana hmanrua a hlante hi Pulse Oxymeter, BP Digital Medtech, Digital Thermometer leh PPE suit pahnih theuh niin, 3C tana hmanrua a hlan hi Shoe Cover, Face Shield, Hand Sanitizer, Inverter, PPE Set, N95 Mask, Sodium Hypochlorite, Oxygen Concentrator, Digital Thermometer, Electric Kettle, Nebulizer. Good Knight Liquid, Solar Emergency Light leh LED Torch Light te an ni.
Tun dinhmunah Khawzawl District-ah 4C awm zawng zawng hi 24 niin, 3C hi Khawzawlah pathum a awm mek a ni.
He hunah hian Medical Officer Dr Albert Lalhminghlua'n report a pek bakah Pu H Lalramenga, Sub Deputy Commissioner in lawmthu sawina a nei bawk a ni.
Written by H. Lalramenga, SDC, Khawzawl District
