Khawzawl the 28th July, 2021:

Vawiin chhun dar 12:00 khan Pu Zothanmawia, Deputy Commissioner, Khawzawl District Khawzawl Mualvawm field astro turf phah tura hna thawh mek leh Pavilion tur sak mek te a hmunah kalin a enfiah.



 

Khawzawl District Bawrhsap chuan hna tha, rintlak leh rotling siam turin hna thawktu contractorte te chu a chah bakah hna an thawhna kawnga harsatna an tawh te a zawt bawk a ni. 

Field chhuata phullem phah hna thawktu contractor te chuan hna thawh hi chhunzawm chhoh reng a nih thu an sawi a. Field chhuat tur layer pathum phah zawh tawh niin layer chung ber tur stone dust phah hmabak a ni a, fur ruahtui tla avangin chawlh lai lawk a ni tih leh, hemi chhung hian ground sira tui paihna chungkhuh hna thawh a ni tih an tarlang a ni. Ground chhuata stone dust phah zawh hi chuan a hungna (fencing) siamin artificial grass phah a ni tawh dawn a ni.

Khawzawl Mualvawm field siam hna hi UD&PA Department kaltlangin cheng nuai 476 chuang sengin Syncotts International ten an thawk mek a, Mualvawm field zau zawng tur hi 109 metres a sei leh 76 metres a zau tur niin, a hungna tha tak siam a nih dawn bakah lirthei dahna hmun turte a siam a ni dawn bawk a ni.


District Bawrhsap Pu Zothanmawia hian Mualvawm field pavilion sak mek pawh en nghalin, hna an kalpui mek dan leh harsatna an neihte a sawipui a. Pavilion pawh hi UD&PA Department hnuaiah contractor dangin thawkin, cheng 371,67,171.74 sen ralna tur a ni a. A dung metre 29.60, a vang 11.90 Metres tur niin, field zawlah gallery pakhatna a awm ang a, hemi chungah hian gallery pakhat a awm bawk. Field zawl hnuai basement I leh basement II ah te hian inthiarna leh inthlakna pindante a awm dawn a ni.

Vawiina Khawzawl DC in Mualvawm Field leh Pavillion hna kal mek a enfiahna hi Pu James Lalnithanga, SDO(Sadar), Pu Ngurthansanga, DUDO, Pu H Lalramenga, SDC te bakah hna thawktu Contractor te leh Technical mi ten an tawiawm a ni. 


Written by H. Lalramenga, SDC, Khawzawl District

Attachment