Khawzawl, the 12th October, 2021:
Vawiin chawhnu dar 1:00 khan Pu C.C. Lalchhuangkima, Deputy Commissioner, Khawzawl District chuan Puilo rama Dhariwal Buildtech Limited (DBL) camp-ah National Highway Bypass Road chungchangah NHIDCL aiawh, Kawlkulh leh Dulte Joint Action Committee for NH-6 leh Dulte Economic Growth & Development Committee hruaitute a kawm.
Pu C.C. Lalchhuangkima, Khawzawl District Bawrhsap chuan JAC for NH-6 leh Dulte Economic Growth and Development Committee te ngenna thlen chu zirchianga bawhzuipui a inhuam tih a sawi a. Thutawp siamtu tur a nih loh avangin thuneitu sâng zawkte thutlukna chu engpawh nise pawm thiam turin a ngen bawk a. Bawrhsap hian NHIDCL leh Dhariwal Buildtech Limited hotute chu hmalak ho dan tur a sawipui nghal a ni.
He hunah hian JAC for NH-6 leh Dulte Economic Growth and Development Committee hruaitute chuan an khawtlang tana tha tur nia an hriat leh mipuite hmakhua ngaihtuah nia an inhriat dana hma la an nih thu leh National Highway No. 6 laih mekin Kawlkulh leh Dulte khua a paltlang theih nana hma an laknaah mimal tumah huat an neih loh thu an sawi a. An hmalakna chu compensation beisei vang mai nia thuthang awm thin chu a dik lo tih sawiin, NH-6 bypass road hian Kawlkulh leh Dulte khua a paltlang dawn lo a nih chuan an ram chin ah kutthlak an phal dawn lo tih an tarlang bawk. An hmalakna kawnga District Bawrhsap an ngenna chu ziakin Bawrhsap hnenah hian an thehlut nghal bawk a ni.
He hunah hian Puilo khawtlang hruaitute pawhin thu sawiin, NH-6 laih mek hian Kawlkulh leh Dulte chu paltlang ve se an duhpui thu an sawilan rualin, Puilo ram chhunga khawtlang tiralmuang lo leh nunau tithlabar zawnga hmalakna awm thin chu ti tawh lo turin an ngen tih Kawlkulh leh Dulte khawtlang aiawhte chu an hrilh bawk a ni.
Vawiina NH-6 bypass road chungchanga inkawmhonaah hian Pu James Lalnithanga, SDO(Sadar), Pu Lalringliana, Additional SP leh Pu H. Lalramenga, SDC ten Bawrhsap hi an tawiawm a ni.
Written by H. Lalramenga, SDC, Khawzawl District
Attachment
