Khawzawl, the 29^th March, 2022:

Vawiin khan Kawlkulh khuaa khawsa mek Pu C. Laldanga in kâng tanpuina chu State Disaster Response Fund (SDRF) atangin Pu C.C. Lalchhuangkima, Deputy Commissioner, Khawzawl District chuan  DC office-a thawkte kaltlangin a hlan. 

Pu C. Laldanga in hi Assam type niin nizan dar 9:00 vel khan a kang a, an awmna hi a fal deuh avangin khawchhung mi tlawmngaiten theihtawp an chhuah chungin bungrua chuh hman lohin a kang a ni. He inah hian Pu C. Laldanga te chhungkua member pathum chengin, inhnuai hi chhungkaw member pali awmna Pu Malsawmdawnga s/o Pu C. Laldanga te chhungkua in an luah bawk. Kangmei chhuah lai hi ram lama hnathawka an riah lai leh, ina awm te pawh pawna an chhuah lai tak a ni a, mihring nunna chan leh hliam tuar an awm lo hlauh a ni. 

He chhiatna thlen chungchang hi hriat a nih ve leh District Bawrhsap Pu C.C. Lalchhuangkima kaihhruainain hma lak nghal a ni a. Vawiin khan Pu H.Lalramenga SDC & DM&R Nodal Officer chu Kawlkulhah kalin kangmei chhuahna hi a hmunah a tlawh a, SDRF atangin in kâng bakah bungbel leh bungrua an hloh chhawmdawlna pawisa fai Rs. 1,05,700 (Cheng nuai khat sangnga zasarih) leh silpaulin pahnih chu kangmei tuar chhungkaw pahnihte kutah a hlan a ni. Kawlkulh Village Council President leh VLDMC Chairman Pu Vanlalhruaia hnenah hnatlang thingpui lumna tur pawisa fai hlan a ni bawk.

In kang tuartute chhawmdawlna hlan zawhah hian khawtlang hruaitute nen hmalak zel dan tur sawiho a ni a. In hi khawtlangin sak that tura ruahmanna siami niin, Kawlkulh leh Kawlkulh North khawtlangin a sakna tur châk lakkhawm leh vehbur khawn te an buaipui dawn a ni. Hemi chhung hian kangmei tuar chhungkuate hi Forest Rest House ah an awm rih ang. 

Kawlkulh leh Kawlkulh N khawtlang hruaitute nen hian kangmei chhuah chhan hrang hrang langsar  zualte leh a inven theih dante sawiho a ni bawk. 

Written by H. Lalramenga, SDC, Khawzawl District