Khawzawl, the 9th August, 2022: Mizoram Badminton Association leh Khawzawl District Badminton Association buatsaih Mazuala Memorial 36th MBA Official Championship Senior - 2022 chu Khawzawl Vengthar YMA Hall-ah khelh tan a ni a. A hawnna hun  Khawzawl Vengthar YMA Hall-a neih hi District Bawrhsap Pu C.C. Lalchhuangkima chuan khuallian niin a telpui a, badminton inelna lian hi a hawng a ni.

Tournament hawnna inkhawm Organizing Chairman Pu H. Vanlalhruaia kaihhruaiah khuallian Pu C.C. Lalchhuangkima chuan  Mizoram State Level Tournament Khawzawlin a thleng thei chu lawmawm a tih thu a sawi a. Khawzawl chu District thar a nih angin khual khua atanga lokalte chu an thlenna chungchangah duhthusam ang a nih loh  pawhin hrethiam hram turin a ngen a.  Tournament thleng turin a buaipuitute  theihtawp chhuaha an inpuahchah thu sawiin, district hrang hrang atanga player kalkhawmte chu he tournament hi inkawmngeih nan leh inthianthatna atana hmang turin a chah bawk.

He tournament hi Tuichang bialtu MLA Pu Tawnluia, Deputy CM te chhungkuain an fapa Mazuala hriatrengna tur atana an Sponsor niin, LTM Filling Station chu Co-sponsor a ni a, Mizoram District hrang hrang atangin badminton khel thiam tak tak player 150 bawr vel an fuan khawm a. Inelna hi Category 9 ah August ni 9 atanga ni 12, 2022 chhung hian Khawzawl Vengthar YMA Hall-ah neih a ni dawn a, kar tawp Zirtawpni August ni 12, 2022 hian hmawr bawk tum niin, kharna inkhawmah hian Deputy CM Pu Tawnluia chu khuallian ni a he hun hi hmanpui tura beisei a ni.