Khawzawl, the 1st December, 2022: Rambuai avanga Arro khua Khawzawla khawm anih hnua khaw hmun ngaia an let leh atanga mei mit lova an awm champha kum 50-na (1972-2022), Golden Jubilee lawmna leh haw runpui buatsaih chu vawiin khan Khawzawl District Bawrhsap Pu C.C. Lalchhuangkima chuan khuallian niin a hmanpui a, Golden Jubilee pual lungphun a hawn bakah Souvenir a tlangzarh. 

Khuallian Pu C.C. Lalchhuangkima chuan Khawzawl District-a Arro khuain Mizoram buai hnuaia an khua an luahlum leh atanga kum 50-na, Golden Jubilee lawmna leh khawchhuakte haw runpui an buatsaih thei chu a lawmpui thu a sawi a. In ropui, Car leh bungraw dangte aiin mihring rohlu leh pawimawh chu taimakna hi a ni, a ti a. Tunlaiin social media-ah ṭhalaite hnathawk lai aiin an inchei nalh lai hmuh tur a tam thu sawiin, ṭhalaite hnathawk lai social media-a hmuh tam hun a nghahhlelhawm hle a ni, a ti a. Mihring ro hlu ber taimakna ngaipawimawha hnathawh uar thar turin ṭhalaite a fuih a. Nu leh pa te thawhrimna hre reng tur leh an sulhnu dawlzo phak thei tura tan la turin ṭhalai kalkhawmte chu a sawm a. Eng hna mah hi zahpuiawm a awm lo a ni tih tarlangin, Mizote hnam boral kan nih lohna tur leh hnam zahawm kan nih theihna turin hnathawh kan uar a tul a ni, a ti bawk. 

District Bawrhsap chuan nu leh pa te'n mahni fate theuh enkawl uluk a ṭul thu sawiin, kan hnam nunphung siamṭha turin Kohhran, YMA leh Chhungkua aṭanga ṭan lak thar a ṭul a, zu leh ruihtheih thil dangin nasa taka min luhchilh mek lai hian, mahni chhungkua ṭheuh aṭangin ruihhlo laka kan fihlim theihna turin bul i ṭan ṭha leh ang u, tiin kalkhawmte a sawm nghal bawk.

Golden Jubilee lawmna program chawhma dar 11 a hman tan hi Pu Zoliansanga, Chairman, Organising Committee chuan a kaihruai a. Rev. C. Lalzuiliana'n hunserh a hmang a. Souvenir sawizauna Pu K. Hrangnawna'n a neih hnuah Arro chanchin Col. Lalrawnliana, Ex-MLA in a sawi a. Arro khawchhuak sakhaw puithiam, zirna leh vantlang rawngbawlna kawnga mi chhuanawmte hnenah chawimawina hlan a ni bawk. 

Mizoram buai hnu, kum 1972 a Arro khua an luah thar leh aṭanga kum 50-na, Golden Jubilee leh Arro khaw chhuak haw runpui program hi nizan (30.11.2022) aṭanga hman ṭan niin, nizan lamah tlang hrang hrang aṭanga Arro khawchhuak lokalte lawmna hun hman a ni a. Vawiin khan Golden Jubilee lawmna ruai buatsaih niin, zaninah inthlahna hun hmangin Jubilee lawmna leh haw runpui puala hun hman chu khar a ni ang.