Khawzawl, the 31st May, 2022: India ramin zalenna a hmuh champha kum 75-na lawmna “Azadi Ka Amrit Mahotsav” kalpui mek zelah a lawmna peng pakhat atan, India ram pumah “Mi Retheite Chhawmdawlna Inkhawmpui – Garib Kalyan Sammelan” chu buatsaih a ni a, he hunah hian Prime Minister Narendra Modi chuan sawrkar scheme hrang hrang 16 (sawmparuk) zet hnuaia tanpuina dawngtute chu hmaichhanah kawmna hun a hmang a ni.

India ram pumah, state leh district zawng zawngah he lawman hun hi hman a ni a. Khawzawl District-ah chuan Prime Minister in tanpuina dawngtute kawmna a neih hma in, zing dar 9:45 ah DC’s Conference Hall, Khawzawl inkhawm tawi buatsaih a ni. He inkhawm tawi ah hian department hrang hrang 5 (panga) atangin an scheme kalpuite sawifiahna hun ngaihthlak a ni a. Scheme hrang hrang atanga tanpuina dawngtute nen inkawmna hun neih a ni a, Pu C.C. Lalchhuangkima, Deputy Commissioner chuan beneficiaries te chu kawmna hun a hmang bawk a ni. Inkhawm tawi hi Pu James Lalnithanga, SDO (Sadar) in a kaihruai a, Pu Obed Lalmalsawma, SDC in Vote of Thanks a sawi a ni. Inkhawmah hian District chhunga scheme hrang hrang thlan chhuah atanga tanpuina dawngtute leh khawtlang hruaitute mi 64 zet an kalkhawm a ni. 

Inkhawm tawi hi a tawp hnuah, dar 11:00 ah Shimla atanga Prime Minister Narendra Modi an mipuite hnena a thuchah leh scheme thlan chhuahte atanga tanpuina dawngtu India ram hmun hrang hrang a awmte a kawmna chu video-conferencing hmangin an chhim zui nghal a ni.