Khawzawl, the 5th April, 2022:
Vawiin chawhnu dar 2:00 khan Pu C.C. Lalchhuangkima, Deputy Commissioner, Khawzawl District kaihhruaiin DC Conference Hall ah African Swine Fever (ASF) dinhmun thlirhona leh, Khawzawl District a ASF a lên nawn lohna tura hmalak dan tur ngaihtuah a ni a, District dang atanga vawk, vawksa leh vawksa atanga thilsiam te lakluh khap nise tiin rel a ni.
Vawiina meeting ah hian Dr. Philip Lawmsangzuala, Veterinary Officer chuan Khawzawl District ah vawk thi report awm ve tawh mah se vanneihthlak takin ASF case confirm a la awm rih lo tih a tarlang a. Chutihrualin District thenawm leh Mizoram hmundangah te ASF vanga vawk thi engemawzat a awm chhoh reng avangin fimkhur a ngai hle tih a sawi.
District Bawrhsap hova meeting chuan ASF vanga vawkvulhtute mai bakah mipui nawlpuiin harsatna an tawh theih dan te uluk taka ngaihtuah chungin, District pawn hmundang atanga vawk, vawk note, vawksa leh vawksa atanga siam thil engpawh lakluh khap nise tiin a rel a. District chhung khaw pakhat atanga khaw danga vawk leh vawk note lalut duhte pawhin AH&Vety Department hnen atangin phalna lak hmasak zel nise tiin a rel bawk a ni.
Meeting ah hian Additional SP Pu Lalringliana Pachuau, SDO(Sadar) Pu James Lalnithanga, SDC Pu H. Lalramenga te bakah District VC Association, Joint VC Khawzawl leh Khawzawl Vawkvulh Association aiawhte an tel a ni.
Written by H. Lalramenga, SDC, Khawzawl District
