Khawzawl, the 4th September, 2021:
Khawzawl District Headquarters-ah Nilaini atanga Covid-19 Mass Testing kalpui chu vawiin lamah pawh chhunzawm zel a ni a. Vawiin bikah hian Khawzawl Town chhunga veng pathum heng – Zaingen, Zuchhip leh Arro-ah te Mass testing hi kalpui niin, vawiin tlai dar 4:00 thlengin sample 1,017 test atangin Covid-19 positive pahnih hmuhchhuah an ni.
Khawzawl District Headquarters hi September ni 1, zan dar 7:00 atang khan Restricted Area-a puan niin, Covid-19 hrileng dinhmun dik tak hriat a nih theih nan September ni 2 atangin Mass testing neih nghal a ni. Vawinia Mass testing neihna hmunte hi Pu C.C. Lalchhuangkima, Deputy Commissioner & Chairman, District Disaster Management Authority, Khawzawl District chuan a hmunah tlawhin a enpui a, Covid-19 positive natna langchhuak lo leh langchhuak nasa lote enkawlna tura ruahman 4C thenkhatte pawh a tlawh nghal bawk a ni. Bawrhsap hi Pu H. Lalramenga, SDC in a tawiawm a ni.
Dr. Lalnunpuii Renthlei, Medical Officer (Ayush) i/c Covid-19, Khawzawl District Hospital in a tarlan danin Khawzawl Town chhunga Covid-19 Mass testing kalpui mekah Nilaini atang khan vawiin chawhnu dar 3:00 thlenga sample test tawh zawng zawng chu 2,960 niin, Covid-19 positive 8 (pariat) hmuhchhuah an ni tawh a ni. Mass Testing hi karleh lamah chhunzawm tura ruahman a ni.
Vawiinah vek khan Pu Lalrohlua, Additional Deputy Commissioner, Khawzawl District chuan District chhunga Covid-19 active case awmna khaw thenkhat heng – Chawngtlai, Khawhai, Sialhawk leh Biate te tlawhin Village Level Task Force te nen an inkawm a, Covid-19 hrileng meka an dinhmun leh hmalak tawh dante bakah, hmalak zel dan turte a sawipui a. District chhung khaw dangah te hian a tul dan ang zela Covid-19 Mass testing kalpui tum a ni.
Vawiin chawhnu dar 3:30 thlengin Khawzawl District-ah Covid-19 active case hmuhchhuah tawh zawng zawng chu 263 a ni a, heng zinga mi 119 te chu dam taka chhuak tawhin, tun dinhmunah Covid-19 active case 144 an awm mek a ni.
Written by H. Lalramenga, SDC, Khawzawl District
