Khawzawl, the 2nd November, 2020
Mizoram sawrkar thupek angin Khawzawl Distric-ah October 26, 2020 atangin Covid-19 No Tolerance Fortnight kalpui a ni a. VLTF, Police leh Covid-19 Executive Duty te thawhrimna zarah mipuiin an ngaipawimawhin sawrkar thuchhuah hrang hrangte an zawm tha hle.

Covid-19 No Tolerance Fortnight denchhen hian Khawzawl district chu zone 13 ah then niin, zone tinah hian sawrkar hnathawk, VLTF leh police te awmna Covid-19 Executive Duty team siam a ni a. Heng team te hian duty point a an duty bakah an bial (zone) huamchhung theuh ngun takin an fangkual thin a. Covid-19 hrileng kaihhnawiha sawrkar thupek zawm lote chu ngaihhnathiamna awm lo a an man zel bakah a remchan dan ang angin Covid-19 laka inven dan zirtirna an pe thin bawk a ni.

Khawzawl town chhungah zone pakua (9) awmin, duty point pasarih (7) siam a ni a. Duty point-ah hian Executive duty member thenkhat awmin, a tam zawk chu an zone chhung fangin an chhuak thin a ni.

Khawzawl District Bawrhsap Pu Zothanmawia chuan kar hmasa Nilaini khan Khawzawl town chhunga duty point te hi a tlawh kual a. Mask nei lo te hnena pek tur mask thahnem tak bakah Executive Duty team member-te hman tur sanitizer a sem a ni.

Nimin (November 1, 2020) tlai dar 3 thleng khan Khawzawl District chhungah Covid-19 chungchanga dan zawm tha lo mi 262man tawh niin, The Mizoram (Containment and Prevention of the spread of Covid-19) Act, 2020 behchhana pawisa chawitir zat chu Rs. 25,150 a tling tawh. Tin, Khawzawl DDMA leh sawrkar office hrang hrangten Covid-19 laka himna inzirtirna tilang thei banner an tar tawh zat chu 71 niin, Khawzawl District-a VLTF ten banner hi 134 an tar tawh a. Sawrkar hnathawk mi 701 in Jan Andolan e-Pledge an la tawh bawk a ni.

Khawzawl District Disaster Management Authority chuan khauh takin Covid-19 No Tolerance Fortnight hi a kalpui zel dawn a. Mipuite he No Tolerance Fortnight leh a hnulam thlenga Covid-19 laka invenna hrang hrangte, sawrkarin a tihchhuah thinte zawm a, nitin nunphunga senglut turin a sawm a ni.

Written by H. Lalramenga, SDC, Khawzawl District