Khawzawl, the 25th June, 2021
Vawiin khan Chief Minister’s Relief Fund atanga sum dawn hmangin Khawzawl District chhunga Total Lockdown in a nghawng nat zual, chhungkaw 869 hnenah buhfai, tel leh dal sem a ni a. He hun hi Pu Zothanmawia, Deputy Commissioner, Khawzawl District chuan kaihruaiin, chhawmdawlna sem tur phurtu motor te chu DC office kawt atangin a vailiam a ni.
A mawmawhte tana buhfai, dal leh tel semna hi zingkar atangin DC office-a thawkten Covid-19 SOP zawm chungin an buaipui a, District chhunga veng/khaw hrang hranga VLTF te nen tangrualin an sem a ni.
CM Relief Fund atanga chhungkaw harsate chhawmdawlna tur pawisa dawn hmang hian buhfai quintal 109, dal quintal 36.25 leh tel packet 869 semchhuah phawt a ni a. Hengte hi DC office ah phurhkhawm niin, DC office atang hian LPK paruk hmangin Khawzawl District chhunga khaw hrang hrangah te semchhuah a ni.
CM Relief Fund atanga chhawmdawlna dawngtute hi Khawzawl District-a Village Level Task Force (VLTF) ten an veng/khaw mipuite dinhmun thlir chunga an thlanchhuah niin, Khawzawl District-a VLTF 38 zinga 11 te chuan an veng/khuaah CM Relief Fund atanga chhawmdawl ngai chhungkua an awm rih loh thu an report a ni. In report zingah Khawzawl town chhunga VLTF 8 atangin chhungkaw 322 leh District chhung khaw dang VLTF 19 atangin chhungkaw 547, an vaiin chhungkaw 869 hnenah tanpuina hi sem a ni a, tanpuina dawngtu zat hi mi 3,622 (sangthum zaruk sawmhnih leh pahnih) an ni bawk.
Chhawmdawlna hi mi pakhatah buhfai kg 3 leh dal kg 1 theuh hisapin sem a ni a. Chhungkaw pakhatah tel packet 1 theuh hisapin sem a ni bawk a ni.
Written by H. Lalramenga, SDC, Khawzawl District
