Dated Khawzawl, the 17^th February, 2021: 

Vawiin (17.02.2021) thlengin Khawzawl District-ah Aadhaar card 588 pekchhuah tawh a ni a, EPIC card 1,182 print tawh niin, e-District kaltlangin certificate hrang hrang 1,048 pekchhuah a ni tawh bawk.

Khawzawl Deputy Commissioner’s Office chu Biometric Enrolment Agency atan ruat a nih hnuah December 7^th, 2020 atangin BME Operator te hnen atangin Aadhaar card pekchhuah tan a ni a. Tunah hian Khawzawl District-ah BME Operator pathum – Pu Lalrotluanga Ralte, Khawzawl, Pu Zothantluanga, Khawhai leh Pu David Lalramkima, Chhawrtui te an awm mek a, vawiin thlenga Aadhaar pekchhuah tawh zat chu 588 a ni tawh a ni. 

EPIC/Voter ID pawh Khawzawl DC Office, Election Branch-ah January 20^th, 2021 atangin 22-Tuichang Assembly Constituency mipuite tan print tan a ni a. Mi 1,182 hnenah EPIC hi pekchhuah tawh niin, an zingah hian Electoral Roll-a lut thar (Vote nei thar leh Constituency dang atanga insawn) mi 636, hming leh thildang siamtha mi 417 leh, Constituency pakhat chhunga insawn mi 129 an awm a ni. 

Pu Zothanmawia, Deputy Commissioner, Khawzawl District in October 16^th, 2020 a e-District a hawn atangin Khawzawl District mipuite tan e-District kaltlangin certificate hrang hrang 1,048 pekchhuah a ni tawh a. Heng zingah hian Tribal Certificate 294, Income Certificate 431 leh Residential Certificate 323 te a tel a ni. E-District kaltlanga Certificate dil duhte tan CSC operator heng – Pu Lalrotluanga Ralte, Khawzawl, Pu Zothantluanga, Khawhai, Pu David Lalramkima, Chhawrtui, Pu Benjamin Zorinmawia, Kawlkulh leh Pu R.Lalsangpuia, Sialhawk te kaltlanga dil theih a ni. 

Written by H. Lalramenga, SDC, Khawzawl District