Khawzawl, the 9^th December, 2021:

Vawiin chawhma dar 11:00 khan District Disaster Management Authority, Khawzawl District chu an chairperson Pu C.C. Lalchhuangkima, Deputy Commissioner ni bawk hovin DC Office Conference Hall-ah an thukhawm a, chak zawka Covid-19 vaccination kalpui dan tur bakah District chhunga Covid-19 positive pung zel chungchanga hma lak dan tur an sawiho. 

Meeting-ah hian Khawzawl District chhunga kum 18 chunglam zingah 82% in first dose an lak tawh laiin second dose la tawh chu 62.4% chauh a ni tih tarlan a ni a. Second dose la an tlem chhan hrang hrang zingah 2^nd dose lak la hun lo hrim hrim te, 1^st dose leh 2^nd dose inkara Covid-19 positive leh vaccine dose la kim tawh si, Cowin portal chian loh vanga 2^nd dose la lo anga lang an awm thin tih te tarlan a ni a. Sakhaw thil vanga Covid-19 vaccine la duh lo hrim hrim engemawzat an awm tih tarlan a ni bawk.

Mi tam zawkin Covid-19 vaccine an lak lak theih nana in tina kal a vaccine pek, sawrkar laipui scheme “Har Ghar Dastak” chu Khawzawl District ah kalpui tan a ni tih ngaihthlak a ni a, hei hi District chhunga Medical Officer ten theihtawp chhuaha kalpui ngei nise tiin rel a ni. Tin, DDMA hmingin Covid-19 vaccine dose kim la ngei tura mipuite ngenna tihchhuah nise tih a ni bawk. 

Vawiina meeting-ah hian Khawzawl District chhunga Covid-19 positive pung chho leh mek chungchang pawh ngaihtuah a ni a. District chhunga Village Level Task Force, Kohhran leh zirna in te chu uluk leh fimkhur zawka Covid-19 Appropriate Behaviour zawm tura hriattirna pek nise tiin meeting chuan a rel. Tin, tul lova zanlama pawnchhuak tur tihtlem nan zan curfew chu dar 8:00 atanga tan nise tiin rel a ni bawk.

Nimin tlai dar 5:00 thleng khan Khawzawl District-ah Covid-19 active case mipa 71 leh hmeichhia 50, an vaiin 121 an awm mek a. Heng zinga za-a sawmnga (50%) aia tam chu kum 18 chin hnuailam an ni tih tarlan a ni. 

Meeting-ah hian Khawzawl DDMA member te bakah District Task Force on Covid-19 Vaccination member te, District chhunga Medical Officer te an tel a ni. 

Written by H. Lalramenga, SDC, Khawzawl District