Khawzawl, the 1st December, 2021:

Vawiin chawhma dar 10:00 khan District Disaster Management Authority, Khawzawl District leh National Service Scheme (NSS), Khawzawl Higher Secondary School te buatsaihin Zaingen Branch YMA Hall-ah Khawzawl HSS zirlaite tan chhiatrupna hmachhawn dan inzirtirna, “Capacity Building Training for Response to Disasters” neih a ni a. He hun hi Pu C.C. Lalchhuangkima, Deputy Commissioner & Chairman, Khawzawl DDMA chuan khuallian niin a hmanpui.



 

Training hawnna hun Pu Kamdingliana, Programme Officer, NSS & Lecturer, Khawzawl HSS kaihhruaiah khuallian Pu C.C. Lalchhuangkima chuan thu sawiin chhiatrupna chu engtiklai pawha thleng thei, chiai lo leh rilru fim taka hmachhawn ngai a ni, a ti a. Chhiatrupna hmachhawn tura kan bula hmanraw hrang hrangte tangkai taka hmang thei tur leh, midangte zirtir chhawng thei tur chuan training neih fo a tul thin tih a sawi. NSS te chu nakin lawka nula tlangval tur, YMA leh khawtlang pawhin a rinrawl ber tur an ni tiin, rilru inhawng leh thiam tum taka training turin a chah a ni. 

 

Pu Lalrohlua, Additional Deputy Commissioner & CEO, Khawzawl DDMA pawhin thu a sawi a. Disaster Management chuan chhiatna thlen hnu a tanpuina leh chhawmdawlna pek piahlamah a thlen hmaa lo inrin lawk dan inzirtir te, chhiatna thleng thei laka inven dan ngaihtuah a plan lo siam te a huam tel vek a ni, a ti a. Training tura kalkhawm zawng zawngte lawmna thu a sawi baw.k.

 

Vawiina trainingah hian Pu H. Lalramenga, Sub-Deputy Commissioner & Nodal Officer, DM&R chuan powerpoint presentation hmangin Lirnghin laia tih tur leh tih loh tur te, State Disaster Response Fund (SDRF) atanga tanpuina awm thei te zirtirna a pe a. Khawzawl DDMA hnuaia Quick Response Team member-ten chhiatrupna a thlen changa mipui vantlang tana chhanchhuah hna thawh dan, “Community-based Search and Rescue” technique hrang hrang an entir bakah First Aid chungchang te, hliam tuar zawnna siamchawp dan te, QRT hmanraw hrang hrang sawifiahna leh a hman dan inzirtirna te an pe a ni. Heng inzirtirnaahte hian zirlai naupang a tam thei ang ber a taka tihtir ve zel an ni bawk. 

 

Vawiina training-ah hian Khawzawl HSS zirlai 200 bawr vel an tel a. Pu K. Lalremruata, LDC, DC’s Office chuan lawmthu sawina neiin training a khar a ni.


Written by H. Lalramenga, SDC, Khawzawl District