Khawzawl, the 13^th August, 2021:

Vawiin chawhnu dar 3:00 khan Pu C.C. Lalchhuangkima, Deputy Commissioner, Khawzawl District hovin DC Office Conference Hall-ah Khawzawl District huam chhunga Graduate (UG) thar, Distinction a pass chinte lawmpuina hun hman a ni.

Khawzawl District Bawrhsap Pu C.C. Lalchhuangkima chuan he hunah hian  thu sawiin, zirlai hlawhtlinna chang tharte chu Khawzawl DC office chuan a lawmpuiin a chhuang hle a ni a ti a. Eng line ah pawh kal se, taima tak a bei a, an khua, Khawzawl District leh Mizoram tihmingthatu ni thei tura theihtawp chhuah thin turin a fuih a ni. 

Khawzawl DC chuan eng kawng zawh tur pawhin inbuatsaihna tha neih a pawimawh zia sawiin, tuna result chhuanawm tak an neih chu duhtawk mai lova inzir chhunzawm zel turin zirlaite chu a fuih a. Tuina leh tum mumal tak neih chu hlawhtling tura thil pawimawh tak a ni tih sawiin, an tumna leh tuina chu huaisen taka bawhzui ngam turin a chah a, an kal zelna turah duhsakna a hlan zui a ni.

Vawiina graduate tharte lawmpuina hunah hian Pu Lalrohlua, Additional Deputy Commissioner pawhin thu sawin, hlawhtlinna tluantling nei tur chuan Pathian tihna thinlung nen theihtawp chhuaha bei thin turin zirlaite a chah a. Pu James Lalnithanga, SDO(Sadar) leh Pu H. Lalramenga, SDC te pawhin zirlaite fuihna thu tawi an sawi bawk.

Khawzawl District huam chhungah hian kumina Under Graduate (UG) result chhuakah Distinction-a pass mi 19 (sawmpakua) an awm a. Khawzawl DC Office chuan lawmpuina Certificate bakah pawisa fai a hlan theuh a ni. 

Written by H. Lalramenga, SDC, Khawzawl District