Khawzawl, the 30th September, 2021:

Vawiin chawhma khan Pu C.C. Lalchhuangkima, Deputy Commissioner, Khawzawl District chuan Khawzawl District chhung Tualte khuaa tomato chinna hmun a tlawh a. Khawtlang hruaitute leh tomato chingtute hnathawh chu ropui a tih thu sawiin, sawrkar department hrang hrangte tan pawha ngaihsak loh theih loh leh hmalakpui chakawm khawpa thawk chhunzawm zel turin a fuih.

Khawzawl District Bawrhsap Pu C.C. Lalchhuangkima chuan Tualte khawdaia tomato chinna hmun tlawhin, hlawk lehzuala kalpui a nih theih dan tur ngaihtuah a department te nen thawhho that a pawimawh tih a sawi a. A bik takin a chin dan leh leitha hman dan chungchangah Horticulture Department leh Agriculture Department te nen tangkawpa inzirtir uar a pawimawh tih sawiin, anmahni pawh inchhiar a, inzir taima turin tomato chingtute chu a chah a ni. 

Tualte khuaah hian tun dinhmunah chhungkaw 130 velin tomato hi ching mekin, kuminah quintal 1,800 vel an hralhchhuak tawh a, kumtawp hmain quintal 2,500 hralhchhuah theih an inbeisei tih khawtlang hruaituten DC hi an hrilh a. Nakum lama tomato ching duh in report tawh zat chu chhungkaw 160 chuang ni tawhin, hemi atana VC ten ram an theh turah inkalpawhna leh tomato thiarna atan kilometre li vel kawng laih belh a ngaih thu an sawi a. DC chuan an mamawh anga kawng laih a nih theih nan hmalakpui a inpeih reng thu khawtlang hruaitute chu a hrilh a ni. 

DC hian tomato thar sa te dahkhawmna tur, SPMRM atanga sak pawh a tlawh a. Tomato atanga ketchup siamna tur khawl, bialtu MLA Pu Tawnluia, Deputy Chief Minister ni bawkin MLA Fund atanga a leisak chu a nih dan tur anga hmang tura tih ngaite enhoin, tun dinhmunah a in ding sa zauh, electric power lakluh, tui dah khawlna neih bakah furniture leh a khawl bungraw la kim lote lakkhawm a ngaih thu sawiho niin, a kaihhnawih sawrkar department te nen tanghoa chak zawka hmalak nise tih a ni.

District Bawrhsap hi Pu B. Ramnungsanga, District Agriculture Officer, Dr. Saithangpuia, BDO, Pu H. Lalramenga, SDC leh Pu Peter Lalramhluna, ADHO ten Khawzawl atangin an tawiawm a. Tualte-ah hian Village Council leh Political Party hrang hrang aiawhte bakah Tualte Tomato Grower Association leh NGO hrang hrang (YMA, MHIP leh MUP) aiawhten lo dawngsawngin an tawiawm bawk a ni. 

Written by H. Lalramenga, SDC, Khawzawl District