Khawzawl the 22nd July, 2021:
Pu Zothanmawia, Deputy Commissioner, Khawzawl District chuan vawiin chawhnu dar 1:00 khan National Highway No 6 laih zauh hna thawh chhoh mekah, Khawzawl leh Champhai inkar kawngpui KM 26.78-a thui laih bultan tur chu Khawzawl Lungvar veng JNV gate bulah a hawng.
Khawzawl District Bawrhsap Pu Zothanmawia chuan thu sawiin, hun rei tak atanga khawchhak tlang dung mipui ten an lo nghahhleh tawh, a tak a chang tur chu lawmawm a tih thu a sawi a. Champhaiah hna avangin a lo awm tawh thin a, Champhai leh Aizawl inkar darkar 7 vel thang a tul thin a, fur lai phei chuan zin kawngah rei tak tak thang a ngai thin a ni tiin, double lane kawngpui laih zawh hun tur chu nghahhlehawm a tih thu a sawi a ni. Pu Zothanmawia chuan Khawzawl DC-a a thut lai ngeiin kawng sial zauh hna thawh a ni ta leh, Dulte daia kawng laih zauh hna thawktuten hna tha taka an thawk chu lawmawm a tih thu a sawi a. He kawngpui hi kut hnathawktute tan pawh malsawmna a nih tur thu sawiin, an thlai deh chhuah te awlsam zawk leh hun reilote chhungin Aizawl an panpui thei tawh dawn a, a nghahhlehawm hle a ni, a ti bawk.
He hunah hian Pu Lalrohlua, Additional Deputy Commissioner pawhin thu sawiin, Khawzawl DC office chu kawng laih zauh hna thawh tur atana ram lak chungchang khawihtu an nih angin, theihtawp chhuaha DC hova hma an lak dan tlangpui a tarlang a. Ani bakah hian Champhai NGOCC hruaitu zing ami Pu David Thangluia leh Khawzawl Sub Headquarters YMA Finance Secretary Pu Lalnunenga ten thu an sawi bawk a ni.
Tuna State Highway hman mek, Khawzawl leh Champhai inkar kawng hi kilometre 40 a thui a ni a. Kawngpui laih thar tur hi KM 26.78-a thui a ni dawn a, km 13 zetin a hma aiin a tawi dawn a ni. He kawng hi cheng 37,04,32,00,000/- (Cheng tluklehdingawn sawmthum pasarih, vaibelche li, maktaduai thum leh nuai hnih) senga laih turin niin, NHIDCL hnuaia Contractor, Shri Balaji Construction Company ten an thawk dawn a. Shri Balaji Construction Company hian kum 2 chhunga lai zo tur leh, kum 5 dang enkawl zui tura ruahman a ni.
Written by H. Lalramenga, SDC, Khawzawl District
