Khawzawl, the 28th October, 2021

Vawiin khan Pu C.C. Lalchhuangkima, Deputy Commissioner, Khawzawl District chuan Hmuncheng-a Pu Biakchungnunga in kang chu tlawhin, State Disaster Response Fund (SDRF) atanga tanpuina awmte a hlan.

Hmuncheng-a khawsa Pu Biakchungnunga in chu tukin dar 3 vel khan bungrua engmah chuh hmanlo in a kangral a. A inneitute hi buh senga ram an riah lai a nih avangin mihring thi leh hliam erawh an awm lo a ni.

He chhiatna thleng chungchang hi hriat a nih veleh Khawzawl District Bawrhsap Pu C.C. Lalchhuangkima chuan a hmunah tlawh nghalin SDRF atanga tanpuina Rs. 1,01,900/- a pek bakah hnatlang thingpui inna tur Rs. 2000/- a pe a. Tin, he inkang thenawma mi Pu Hrangchungnunga, gas bur puak vanga hliam tuar chu Rs. 1000/- in a kan bawk.

Bialtu MLA leh Deputy Chief Minister ni bawk Pu Tawnluia pawhin in kang tuartute tanpui nan hian Rangva Bundle 5 a pe a, Tuichang North Blok MNF in Rs. 2000/- leh Silpaulin 2 nen Deputy CM tanpuina hi an hlan a ni. Sub Headquarters YMA, Khawzawl chuan Rs. 2000/- leh Silpaulin in chhiatna tawktute hi an tanpui bawk a ni.

Khawzawl District Bawrhsap hi bialtu Zonal Officer Pu Ngurthansanga, District Urban Development Officer (DUDO) in a tawiawm a. Inkang tuatute tanpuina hlan zawhah hian Hmuncheng Village Council President inah thingpui in ho niin, kangmei laka fimkhur dan tur leh kangmei chhuah palha lo hmachhawn dan tur inzirtirna neih nghal a ni.

Written by H. Lalramenga, SDC, Khawzawl District.