Khawzawl, the 13th April, 2021:
Pu Zothanmawia, Deputy Commissioner, Khawzawl District chuan District chhung khaw hrang hrang tlawh chhunzawmin, vawiin khan Khawzawl District chhim lama khaw paruk – Riangtlei, Vangtlang, Tlangpui, Tlangmawi, Sialhawk leh Biate te a tlawh. Pu Zothanmawia hian tunhnaiah Khawzawl District a khaw hrang hrangte a tlawh kim tawh a ni.
Vawiina Khawzawl Bawrhsapin district chhung khaw hrang hrang a tlawhnaah hian Sialhawk khawtlangin Animal Health Centre an din chu a hawng a. Tlangmawi-ah BPL in (house) hawngin, Biate-ah Primary Health Centre a tlawh bawk. Heng bakah hian khawchhung leh a chhehvel hmun pawimawh thenkhatte a tlawh nghal bawk a ni.
Vawiina Khawzawl Bawrhsap bial fang hi Pu Vantlangkhuma, Superintendent, DC office chuan a tawiawm a. Khaw hrang hrangah Village Council member ten Bawrhsap hi lo tawiawm in, thingpui inho pahin khawtlang dinhmun tlangpui leh mamawh te, hmalak dan turte sawihoin hun hlimawm leh hlawkthlak tak hman a ni.
Deputy Commissioner in hetianga an khua ngeia kalchilh a, an hmalakna leh mamawh te hre tura a tlawh chhuak chu District chhung khaw hrang hranga khawtlang hruaitute chuan lawmawm an ti hle a ni.
Written by H. Lalramenga, SDC, Khawzawl District
