Khawzawl, the 24^th March, 2021:

Pu Zothanmawia, Deputy Commissioner, Khawzawl District chuan District chhung khaw hrang hrang tlawh chhunzawmin, vawiin khan Tualte, Chalrang, New Chalrang leh Lungtan te a tlawh a. Khaw hrang hrangah Village Council member ten lo tawiawmin, thingpui inho pahin khawtlang dinhmun tlangpui leh mamawh te, hmalak dan te sawiho a ni a. Hun hlimawm leh hlawkthlak tak an hmangho a ni.

Pu Zothanmawia chuan Tualte khuaah Tualte Vanglai Committee-in an khaw lal Vanhnuailiana Sailo leh midangte hriatreng nana lungdawh an siam chu a hawng a. Khaw hrang hrang a tlawhna-ah hian khawchhung leh a chhehvela hmun pawimawh thenkhat – school, solid waste management centre, hall leh hmundang te a tlawh bawk. 

Khawzawl Bawrhsap hian kar hmasa khan Khawzawl District a Puilo, Chhawrtui, Vanchengpui, Vankal leh Tualpui te tlawhin khawtlang hruaitute nen inkawmna hun tha tak an lo nei tawh bawk a. Deputy Commissioner in hetianga an khua ngeia kalchilh a, an mamawh leh harsatna te hre tura a tlawh chhuak chu lawmawm an tih thu khawtlang hruaitute chuan an sawi a ni.

Written by H. Lalramenga, SDC, Khawzawl District