Khawzawl, the 29th October, 2021:

Vawiin chawhma khan Zaingen YMA Hall, Khawzawlah SBI Lead Bank leh NABARD ten Credit Outreach Program an buatsaih a, he hun hi Pu C.C Lalchhuangkima, Deputy Commissioner, Khawzawl Diatrict chuan a hmanpui. 

He hunah hian Khawzawl District Bawrhsap chuan thu sawiin, Mizo mipui nawlpuite chuan Sum leh pai vawn leh dehchhuah dan (financial literacy) kawngah zirtur kan la ngahin kan la hre thuk lo hle a ni, a ti a. Covid-19 hrileng avangin State sawrkar sum leh pai a tlahniam nasa a, chuvangin mimal leh chhungkaw tinin nasa takin hma kan lak a ngai lehzual a ni a ti. Hemi kawnga mimal leh pawl ang a hmala duh ten bul an tanna turin Central Sawrkar in program tha tak tak  duangin, kawngsir a thil zuar (street vendor) te tan pawh bul tanna tur scheme tha tak a siam a. Heng scheme hrang hrang hrechiang duhte tan Bank lama thawkte zawt hreh lo a, pan thin turin kalkhawm te a chah bawk a ni. 

Khawzawl District Bawrhsap chuan sawi chhunzawmin Khawzawl District chu District taima, bultanna a awm phawt chuan tipung a, nasa taka hma sawn thei  tura theihna nei a ni tih tarlangin, District chhunga Tomato ching leh Lakhuihthei chingte pawhin an hmalakna tizau tura Bank atanga bultanna awm theite chu hmang tangkai se a duh thu a sawi lang bawk. 

Vawiina Credit Outreach Program hi Pu M.Soren Lead Bank Manager, leh Manager, NABARD leh Khawzawl khawchhunga Bank hrang hrang Manager ten an telpui bawk a ni.