Khawzawl the 1st August, 2021:

Vawiin khan Pu Zothanmawia, Deputy Commissioner, Khawzawl District leh Khawzawl DDMA Chairperson ni bawk chuan Khawzawl khawpui chhunga Covid-19 Executive Duty te a tlawh kual.

Pu Zothanmawia chuan Khawzawl District chu Covid-19 hrileng karah enkawl zawh loh khawp  case a la awm lo lawmawm a tih thu sawiin, duty te chu tha thlah mai lo a thahnemngai taka duty thin turin a chah a ni.

Khawzawlah hian April 21, 2021 atanga Covid-19 Executive Duty hi tan niin, tun dinhmunah Khawzawl khawpui chhung veng paruk - Arro, Zaingen, Zuchhip, Kawnzar, Vengthar leh Hermon veng - ah te duty post pakhat theuh siam a ni a. Heng hmunah te hian kartawp telin sawrkar department hrang hranga thawk te nitin an duty thin a ni. Nimin thleng khan dan bawhchhia pawisa chawitir tawh zat chu mi 318 an tling tawh a ni. 

Khawzawl Districtah hian VLTF te pawhin sawrkar inkaihhruaina siamte tha takin an kengkawh chhunzawm zel a. Tin, zan lamah YMA branch hrang hrangte mahni vengah curfew kengkawhin an duty thin bawk. Tun dinhmunah Covid-19 positive enkawl lai mi 2 (pahnih) awm mekin, mi 106 te chu dam takin an chhuak tawh a. Phai atanga rawn haw inkhunghrang lai mi 39 an awm mek bawk a ni. 

Nimina Khawzawl District Bawrhsap in Covid-19 Executive Duty te a tlawh hi SDC Pu H. Lalramenga leh DC office staff thenkhatten an tawiawm a, DC office in duty te chhun thingpui hmeh tur a buatsaihsak chu sem nghal a ni bawk a ni.

Written by H. Lalramenga, SDC, Khawzawl District