September ni 8, 2023 khan Deputy Chief Minister, Tuichang AC bialtu ni bawk Pu Tawnluia chuan Khawzawl Chief Medical Officer (CMO) Office Building chu khuallian niin a hawng a. Building hawn hriatreng nan building tualah ‘Thingthiang’ a phun nghal bawk.
Hawnna puala inkhawm Khawzawl Electric Veng YMA Hall-a neihah Pu Tawnluia chuan District Hospital puitling tak tak ni tura Khawzawl damdawiin-in ke a pen chho mek chu a lawmawm hle a ni tiin CMO Building tha tak neih theih nan a hmalatu Health Minister Dr. R. Lalthangliana leh a thawhpuite chungah lawmthu a sawi a. CMO Office Building-ah hian Elevator dah tuma hma lak mek a nih thu pawh tarlangin, District thar dang pahnih - Saitual leh Hnahthialah te pawh CMO Office Building tha tak hawn thuai a nih dawn thu a tarlang bawk.
Pu Tawnluia chuan Mizoram sawrkarin ngaihpawimawh hrang hrang a nei a, chungte chu - remna leh muanna, ei leh bar hnianghnar, mipuite nitin nun awlsam zawkna te bakah hriselna kawnga hmasawnna te an ni, a ti a. District thar pathum - Khawzawl, Hnahthial leh Saitual Damdawiinte chu District Hospital puitling anga an function theih nan post siambelh leh awmsa hlankai a tul a, he mi kawngah hian department chan pakhat DP&AR chuan hma a la mek zel tih a sawi a. Sawrkar term kal lai mekah - Covid-19, Vawk hri leng, ramri buai, lirnghing leh raltlan vangin harsatna thleng mah se, a theih chin chinah hmasawnna hna thawh zel a ni tih sawiin Deputy CM chuan Mizoram sawrkar flagship program ‘SEDP’ 2nd phase chu chhungkaw 60,000 tan 1st instalment pek chhuah thuai tum a nih thu leh 3rd phase-a dawng tur te pawh thlan chhuah thuai tum a ni, a ti a. Mizoram sawrkar chuan zohnahthlak unaute a thlahthlam ngai dawn lo tih Deputy CM hian a sawi bawk a ni.
Deputy CM chuan Khawzawl District hmasawnna chu District leh Tuichang AC bial mipuite thawhhona rah a ni, a ti a. Department la awm ve lo te pawh bun belh zel tum a ni tih sawiin CMO Office hawn tak chu mipuite tana malsawmna thlentu ni turin duhsakna a hlan.
Khawzawl Addl DC Pu Lalfakzuala pawhin he hunah hian Khawzawl District-in hriselna kawnga hma a sawn theihna tur hmun pawimawh tak hawn a ni ta chu lawmawm a tih thu a sawi a. Hripui leng karah sawrkar tan hmasawnna hna thawh a harsa chungin, Khawzawl District-in hmasawnna hmel a hmu chho mawlh mawlh chu lawmawm a tih thu a sawi bawk. Khawzawl district chhunga hriselna lam enkawltute chu tha taka inphuarkhawm a, mipuite hriselnain hma a sawn zel theih nan thahnemngai taka thawkho zel turin a ngen a ni.
Mizoram Health System Strengthening Project(MHSSP)-a Sr. Civil Engineer, Pu Lalramsanga chuan technical report pein MHSSP chuan Mizoram mipui ten hriselna kawnga hma an sawn theih nan ‘heath system’ leh ‘health infrastructure’ changtlung tak din a tum a ni, a ti a. Saitual leh Hnahthial CMO Building pawh hawn thuai tum a nih thu a sawi bawk. Khawzawl CMO Building hi cheng nuai 418 senga Lushai Engineers ten an sak a ni a; mizopa chhiara chhawng li-a sang a sak niin, square meter 979.2 a zau a ni a, room 17 - Senior CMO, Sr Medical Officer, Drugs Inspector, National Health Mission, District Early Intervention Centre, Accounts Section, Conference Hall, Meeting room, Mobile Medical Unit, Establishment Section, District Blindness Control Programme, District TB Centre, Food and Drugs, NPCDCS, District Vector Borne Diseases Control Program, Expanded Program in Immunization te tan room pakhat theuh bakah Ground Floor-ah Temporary Storage Area pahnih leh a chhehvelah Open Car Parking a awm a, mipa leh hmeichhe inthiarna sawm ve ve a awm bawk a ni.
He hun hi Health & Family Welfare Department Principal Director Dr. Vanlalsawma chuan kaihruaiin inlawmna thu a sawi a. Khawzawl mipuite chu a lawmpui thu sawiin, mipuite hriselna atana thawktu tur te chu neitu rilru pu chunga tawiawm zel turin a ngen a. Dr. PC Lalhmingliana, Sr. Chief Medical Officer, Champhai chuan lawmthu sawina hun a hman zawhah inkhawm hi tihtawp a ni.
