Dated Khawzawl, the 12^th November, 2020:

          Myanmar atanga dan phal loh bungrua chi hrang hrang lak luh doletna tura Khawzawl Tuisenphai bul a Temporary Check Gate siam chu nimin (Novmeber ni 11, 2020) chawhnu dar 2:00 khan Khawzawl District Bawrhsap Pu Zothanmawia chuan a hawng a, Check Gate hawnnaah hian District Executive Force aiawhte bakah Forest Deptt., AH & Vety Deptt., aiawhte leh Joint YMA hruaitute bakah MJA Member te an tel a ni.

          Khawzawl Addl. D.C. Pu Lalrohlua kaihhruaia Check Gate hawnna puala inkhawm tawi buatsaihah Khawzawl District Bawrhsap Pu Zothanmawia chuan, Motor chhuk leh chho te chhinchhiah a, endikna tur Temporary Check Gate hawn a ni ta chu lawmawm a tih thu sawiin Mizoram leh Khawzawl District himna tura thil tha a nihna chuan a tiphur hle tih a sawi a. Helai hmun chauh a Check Gate siam chu a tawk lo tih sawiin Rabungah pawh Check Gate siam a lo ni tawh a, Rabung Check Gate siam tura ruahmanna an siam atanga ni 2/3 hnu lek a Duty tur Khawzawl DFO (Wildlife) Pu C. Lalthankima'n an Staff te a ruahman fel nghal chu lawmawm a tih thu a sawi bawk. 

          DC chuan Check Gate siam lo ni ta chu tanrualna rah a ni tiin, darkar 24 duty tur police te chu Vety Department leh Forest Department lamin karkhatah ni thum (3) ve ve an duty pui dawn tih a sawi a. Duty tur hian YMA te an beisei thu leh VC te pawh an hman changa Duty ve turin a sawm a, a theih anga zanlamah pawh Duty te tawiawm thin turin a sawm nghal a ni.

          Khawzawl District Bawrhsap chuan Checkgate chu bungraw chi hrang hrang bakah dan phal loha vawk leh forest produce chi hrang hrang tawlhruk thin venna atan a tangkai dawn hle tih a sawi a. State pawn atanga rawn hawte an Quarantine Centre thlenga escort na hmun tur a nih bawk avangin Covid-19 hrileng dona kawngah pawh a tangkai thui dawn hle a ni a ti bawk. 

          Vawiina Check Gate hawnnaa Addl. S.P. Pu Lalringliana Pachuau chuan Checkgate hawn a nih theih nana hmalakna tlangpui a tarlang a. Home Department atanga Checkgate hawn phalna hmuh a nih hnuah a hmunhma te endik a, hemi puala District Level Committee pawh vawi nga lai neih a nih thu a sawi a ni. Addl. S.P in a tarlan danin, kumin January atanga October thla thleng khan Khawzawl Police te chuan Dan kalh a bungraw phur Motor 71 bakah Kuhva Bag 1272, Foreign Cigarettes Case 30 leh Poppy Seeds Bag 38 an man a, Dan phal loh thil an man hlut zawng hi Rs.95,38,204/- a tling a. Heng bakah hian Dan kalh a vawk lak luh thahnem tak an lo man tawh bawk a ni.

          Check Gate sak chungchanga In-Charge Pu Vantlangkhuma, Assistant, Khawzawl DC’s office in report a pek danin Checkgate sak hi October ni 24 atanga buaipui tan niin, Checkgate atan hian Tuisenphai bul a Waiting Shed chu pin a ni a, hna tan ni hian SP, DFO, DVO leh P&E Deptt. Staff te bakah Joint YMA hruaitute hnatlangin an thawk chhuak a, hetah hian mi 15 an thawk chhuak thei a. Checkgate siam nan Hnatlang vawihnih koh a nih bakah mistiri leh helper te rawihna nen nileng tha 27 sen a ni a. Checkgate siamna hmanraw chi hrang hrang leina leh duty te mamawh bungraw lei nan sum cheng singnga chuang sen ral a ni tih a tarlang a ni. 

Written by H. Lalramenga, SDC, Khawzawl District