Khawzawl Bawrhsap Pu K. Lalrohlua, Deputy Commissioner chuan Tualpui RMSA High School te Computer Set a pe
Khawzawl, 18th January 2023: Khawzawl DC Pu K. Lalrohlua chuan December ni 19, 2023-a Tualpui khua a tlawh tuma Tualpui RMSA High School ten a hnena mamawh an lo thlen - Computer leh Printer Set chu vawiin khan Tualpui VC te kaltlangin RMSA High School hnenah hian a hlan a. Bawrhsap hian RMSA High School zirlai ten ‘study camp’ an neih chhunga thingpui an inna tur a pe bawk.
Pu K. Lalrohlua hian December ni 19, 2023 khan Tualpui khua hi tlawhin, khawtlang hruaitu Village Council te leh tlawmngai pawl YMA, MHIP leh MUP te nen inkawmna hun BNRSK Meeting Hall, Tualpuiah an hmang a. He hunah hian DC hian khawtlang hruaitute hi zirnaah hma an sawn theihnan tan la turin a sawm a. Khawtlang hruaitute nen an inkawm zawh hian Bawrhsap hian khaw chhunga zirna in - Govt. Primary School, Govt. Middle School, RMSA High School te bakah Health & Wellness Center Tualpui te a tlawh a ni.
Tualpui a tlawh tum hian Bawrhsap hnenah Govt. Primary School leh RMSA High School te hian Computer full set leh Printer an mamawh thu lo thlenin, Bawrhsap hian Govt. Primary School hnenah Computer set hi a hlan nghal a. Vawiin chawhma khan a pisaah RMSA High School ta tur Computer set leh Printer te hi Tualpui VC te kaltlangin a hlan leh a ni. HSLC Exam, 2023 ah khan Tualpui RMSA High School atanga zirlai exam beitu zawng zawng ten hlawhtlinna an chang a, kuminah pawh 100% pass percentage neih leh tumin tan an la mek a ni.
