Khawzawl, 19th March 2024: Broadcasting Infrastructure & Network Development (BIND) hnuaia Doordarshan Kendra leh Mizoram Indigenous Games Association (MIGA) ten an buatsaih Mizo hnam infiamna hmanga inelna “Mizoram Indigenous Games 2024 (Khawzawl District)’ chu vawiin khan Khawzawl Sub Headquarters YMA Field-ah neih a ni a. Khawzawl Bawrhsap Pu K. Lalrohlua chuan khuallian niin intihsiakna hi a hawng.
Mizoram Indigenous Games 2024 hi District Headquarters tinah neih a ni dawn a. Vawiinah hian Khawzawl District chhunga YMA Branch 14 atangin infiammi 19 an kalkhawm a; mimal inelna - Insuknawr, Insaihruipawh, Inbuan leh a huhova inelna – Inkawibah leh Inkepir hmangin an inel dawn a ni. Intihsiakna hi Mizo hnam infiamna te vawn him leh chawi lar zel an nih theih nan buatsaih a ni a. A vawikhatna atan Serchhip District-ah neih a lo ni tawh a, Khawzawl District zawhah hian Saitual District-ah inelna hi buatsaih leh a ni ang.
Hawnna inkhawmah hian khuallian Pu K. Lalrohlua chuan Doordarshan Kendra leh Mizo Indigenous Games Association ten hun pawimawh tak Khawzawl District-ah an rawn buatsaih chu lawmawm a tih thu a sawi a. Mahni hnam tih dan vawn nun leh ngaihsan thiam chu hnam ropui zia a ni, a ti. Khawzawl District chu Mizorama District fai ber a nih thu pawh khuallian hian sawiin, mi changkang apiangin faina an ngaisang a ni, a ti a. Kalkhawmte chu faina kawnga thangharh zel turin a chah a ni.
Khawzawl Bawrhsap chuan kalkhawmte chu thing leh mau, nungcha leh ramngaw te humhalh turin a ngen a. Dik lo taka ramngaw leh ramsa suattu te chu Khawzawl DC Office-ah emaw Khawzawl Divisional Forest Office hnenah emaw thlen turin a ngen a ni. Khuallian hian kalkhawmte chu kangmei tichhuaktu ni lova, thing leh mau vawnghimtu ni theuh turin a chah bawk a ni.
Hawnna inkhawm hi Pu T. Siama, Programme Executive, DDK, Aizawl chuan a kaihruai a. Pu Rohmingliana, President, MIGA, Khawzawl District leh Pu V. Lalbiaknunga, Gen. Secy MIGA Hqrs te pawhin thu an sawi a. Inelna hi Mizo hnam infiamna chawilar leh vawng him zel nan a buatsaih a nih thu an sawi a ni.
