Dated Khawzawl, the 16th October, 2020: 

                   Vawiin chawhma dar 11 khan Pu Zothanmawia, Deputy Commissioner, Khawzawl District chuan DC’s Conference Hall, Darngawn Vengah tunhnaia Khawzawl District in hmasawnna a neih zinga thenkhat E-District, DC Khawzawl Website leh Video Conference Room te a hawng. 

                   Hawnna programme hi Khawzawl-a Head of Office thenkhat, khawtlang hruaitute leh MJA member te nen hman ho a ni a. Pu Lalrohlua, Additional DC in kaihruaiin DC Khawzawl Website hman theih tura hmalakna leh a tangkaina te Powerpoint Presentation hmangin a sawifiah a. Pu H. Lalramenga, SDC leh Pu F. Hmingsangzuala, DA ten E-District kalphung leh a tangkainate an sawifiah bawk a ni.

                   Khawzawl DC Website hi Additional DC kaihhruaina hnuaiah Website Management Team in enkawlin, a bultan nan District Administration kaihhnawih Central leh state sawrkarin Dan (Acts and Rules) a siam pawimawh 40 dah luh tawh niin, news item chi hrang hrang 42 bakah DC office-a document pawimawh zual 160 dah luh tawh a ni a. Certificate hrang hrang dilna form chu download theiha dah niin, Khawzawl-a Department hrang hrang 28 te profile dah luh kim a ni tawh bawk. 

                   E-District Khawzawl project hi ni 12.10.2020 atangin hman tan a ni a. Khawzawl District chhunga Common Service Centre pasarih (7) atanga certificate hrang hrang – Tribal, Residential, Income etc. – dilna lut 191 pawm a ni tawh a ni. Thingtlang miten hla tak tak atanga DC office pan ngai lovin an kawtkai atangin certificate hrang hrang an dilin an hmu thei tawh a ni. 

                    Khawzawl DC office-ah hian Video Conference Room pawh peihfel tawh niin, Central leh State sawrkar online meeting pawimawhte chu thuthmun atangin a zawm ve theih zel tawh dawn bawk. 

                   Presentation zawhah hian DC chuan Website, E-District leh Video Conference Room te hman theiha peihfel a ni ta chu lawmawm a tih thu sawiin, District thar tan chuan hmasawnna rahbi pawimawh tak a ni a ti a. Hmasawnna a awm theih nana taima leh thahnemngai taka thawktu DC Office a officer leh staff te chungah lawmthu sawiin, Website leh E-district te chu bultan mai duhtawk lo a, vil zui reng a pawimawh thu a sawi a. District-a sawrkar hnathawk leh mipuiten tangkai taka an hman turin a hawng zui a ni.

Written by H. Lalramenga, SDC, Khawzawl District