Khawzawl, 5th June, 2024: Vawiin khan Cyclone Remal vanga chhiatna tuarte pualin Mizo Zaimi Inzawmkhawm (MZI) Khawzawl Headquarters te chuan Khawzawl khaw chhung hmun hrang hrangah Mobile Concert an buatsaih a. Concert hi Khawzawl Bawrhsap Pu K. Lalrohlua chuan a pisa tual atangin a vailiam.

Pu K. Lalrohlua chuan Mizo Zaimi Inzawmkhawm Khawzawl Hqrs. ten chhiat tawk te tanpuina kawnga hma an la chu an fakawm hle a ni, a ti a. Khawzawl District chu a tha zawnga hmahruaitu ni zel se a duh thu sawiin, a hming timawitu nih tum theuh turin mitinte a chah. Cyclone Remal vanga chhiatna tawk leh nunna hial chan an awm chu pawi a tih thu pawh sawiin Bawrhsap hian heng chhiatna kara sawrkar, tlawmngai pawl leh mimal te zara mizo tlawmngaihna par chhuak chu a ropui hle a ni, a ti.

Pu K. Lalrohlua hian chhiat tawk te tanpuina sawrkarin rang taka a pek chhuah thin avangin thlamuanthlak a tih thu a sawi a. MZI Khawzawl Headquarters te hmalakna chu thinlung taka a chhuan thu sawiin, sawrkar pisa leh mipui zawng zawng te chu an hmalakna thlawp theuh turin a sawm a ni.

Mobile Concert khuhhawnna hun hi Pu Lallawmpuia, Khawzawl MZI Hqrs President chuan a kaihruai a, Rev. Lalbiaksanga Pachuau, Counsellor, Family Guidance & Counselling Center Khawzawl chuan hunserh a hmang a ni. Bawrhsap pisa tuala hun hman zawh hian Khawzawl khaw chhung hmun hrang hrangah Concert hi neih zui a ni.