Khawzawl 20^th May, 2021: 

Khawzawl District Bawrhsap Pu Zothanmawia chuan nimin khan Kawlkulh leh Dulte khua te tlawhin National Highway No. 6 kawng laih dan tur duh lova heng khaw pahnih ten lungawi lohna an lantir mek chungchangah khawtlang hruaitute a kawm.

DC Pu Zothanmawia chuan National Highway No. 6 kawng laih dan tur Central lamin an tihfel tawh avangin tunah chuan engmah tihdanglam theih a awm tawh lo tih a sawi a. Khaw pahnih khawtlang hruaitute chu an theih tawp chhuahin an duhdante an tilang tawh a, tunah hian tihdanglam theih a awm tawh loh avangin an dinhmun pawm thiam a, harsatna thlen thei zawng a hma la lo turin a ngen. Thawm neih leh thuchhuah siam te pawhin awmzia a nei tawh lo tih sawiin tunah hian ngen tur a awm tawh lova, awmze nei lova boruak tihsosan a hlauhawm tih a sawi a. Kawng hi Central Sawrkar sum a thawh tur a ni a, a laih dan tur pawh Central Sawrkar buaipui a ni tiin kawng laih tur tha taka tawiawm hi khua leh tui kan nihna anga kan mawhphurhna a ni a ti.

Khawzawl Bawrhsap Pu Zothanmawia chuan sawi chhunzawmin, khawtlang hruaitute chuan sawrkar lakah beisei leh duh an nei a nih pawhin an thlensak thei reng a ni a ti a. Media lama thuchhuah siam a intâwng ang chi te pawh tihtawp a hun tawh a ni a ti bawk.

Khawzawl DC hi Additional DC Pu Lalrohlua leh SP Pu PC Lalchunglura ten an tawiawm a. Additional DC chuan khaw pahnih khawtlang hruaitute hnenah Land Acquisition chungchanga hriattur pawimawhte a hrilhfiah a. SP pawhin lungawi lohna lantir mekah dan bawhchhiatna a thlen theih dan leh dan bawhchhiatna in nghawng pawi tak a neih theih dan te a sawi ve bawk a ni.

Nimin vekàh Khawzawl DC, Additional DC leh SP te chuan Puilo khua pawh tlawhin, khawtlang hruaitute nen inkawmhona hun an hmang a ni.

Written by H. Lalramenga, SDC, Khawzawl District