Khawzawl, 26th February 2023: Vawiin chawhma dar 11:00am khan Khawzawl Bawrhsap pisa-ah Khawzawl - Rabung kawng kilometer 33 a thui siam that dan tur chu Bawrhsap Pu K. Lalrohlua hovin Khawzawl PWD Division leh Rabung Village Council ten an sawi ho.
Rabung kawng hi kum 1987 vel a laih niin 1994 vela black topping siam a ni a,hemi hnu hian mumal taka siam that a ni zui ta lo a ni. Rabung VC te chuan kawng hi tum hnih khat kawng chhe zual lai (pot holes etc) han hnawh zeuh zeuh a awm tih loh chu kum 30 vel zet enkawl mumal loh niin an sawi a. PWD lam chuan a theihna ang ang ah a siamna tur sum an zawn thu an tarlang a, NABARD-ah te pawh project siam a an thehluh thu leh a tlang loh thu tarlan a ni. Bawrhsap K. Lalrohlua chuan NABARD lam hotute a lo sawipui tur leh PWD chu Project lo siam tha tura in ruahman tur in a chah a,he kawng siam that na tur hian a theihna apianga hmalak a tum thu a sawi a ni.
Vawiin thutkhawmah hian Khawzawl PWD Division te hian Tualpui-Rabung Road (16.25kms) siam that nan hian North Eastern Council (NEC) hnuai North East Special Infrastructure Schemes (NESIDS) atangin cheng vaibelchhe 78 ruahman a nih thu an sawi a. Hetih lai hian Rabung VC te hian Khawzawl to Rabung via Tualpui siamna tur sum ruahman a awm mek chungin a main road zawk Khawzawl to Rabung via Khualen hi siam ni se an duh thu an sawi a ni.
Attachment
