Khawzawl, the 26th April, 2021

Vawiin chawhma dar 11:00 khan Pu Zothanmawia, Deputy Commissioner & Chairman, District Level Task Force on Covid-19, Khawzawl District hovin Khawzawl Town chhunga Covid-19 Executive Team leader te chu DC Conference Hall-ah an thukhawm. 

Meeting-ah hian Mizoram sawrkar order anga April ni 20, 2021 atanga Covid-19 Containment order kenkawh chungchang thlirletna neih a ni a. April ni 25, 2021 thlengin Khawzawl District Headquarters-ah Covid-19 Executive Team duty ten sawrkar inkaihhruaina siam zo lo mi 59 man tawhin, pawisa chawitir tlingkhawm zat hi Rs. 5,900 a ni tawh tih tarlan a ni. 

Bawrhsap Pu Zothanmawia chuan Covid-19 Executive Team leader leh member te chu khauh zawka sawrkar thupek leh inkaihhruaina te kengkawh turin a chah a. A bikin phalna nei lo a pawn chhuak leh dawr hawng an awm leh awm loh te, phai atanga bungraw phur lo lut tawi khawmuang an awm em tih te enfiah uluk zual turin a chah.  Duty tura ruatte chu office lam nitin hna atanga ‘relief’ tawh an nih angin Covid-19 duty chu an hnapui ber a ni tih a hriattir a, taima leh thahnemngai taka duty turin a chah nghal bawk a ni. 

Vawiina meeting-ah hian Pu PC Lalchunglura, Superintendent of Police, Khawzawl District chuan Covid-19 Containment Order hman a nih chhunga dan leh thupek kenkawh dan chungchang report a pe a. Team Leader te pawhin khauh zawk leh awmze nei zawka duty kalpui a nih theih nana an mamawh te sawiin, rawtna an neihte pawh zau taka sawiho a ni bawk.

Meeting-ah hian Executive Team leader te bakah DC office-a officer te, SP, 2nd IR Bn Deputy Commandant leh Medical Officer i/c Covid-19 te an tel a ni. 

Written by H. Lalramenga, SDC, Khawzawl District

Attachment