Khawzawl, the 3rd May, 2021
Vawiin chawhma dar 10:30 khan Pu Zothanmawia, Deputy Commissioner & Chairman, District Level Task Force on Covid-19, Khawzawl District hovin Khawzawl Town chhunga Covid-19 Executive Team leader te leh Village Level Task Force Chairman te chu DC Conference Hall-ah an thukhawm.
Meeting-ah hian Mizoram sawrkar order anga April ni 20, 2021 atanga Covid-19 Containment order kenkawh chungchang thlirletna neih a ni a. Executive Duty Leader ten report pe in, tun dinhmunah chuan Khawzawl mipui nawlpuiin sawrkar thuchhuak an zawmin thu an awih a, chutihrualin Covid-19 duty ni si lo, ID awrha chhuak an awm thin thu tarlan a ni.
Bawrhsap Pu Zothanmawia chuan Covid-19 Executive Duty leh VLTF te chu mipui himna tura thawk an nih angin an hna a pawimawh hle a ni a ti a. Zone hrang hrang a duty te chu pawn chhuah phalna pek kawngah te, dan bawhchhia man leh dawr hawn chungchangah te rualkhai taka kal turin a chah a. Zin veivakte pawh sawrkar order in a phut angin an rawn chhuahna VLTF lehkha an nei em tih te, phai atanga bungraw phur lo lut, backload changa tawi khawmuang an awm em tih te uluk taka enfiah thin turin a chah bawk.
Khawzawl khawpui chhung leh district-ah hian Covid-19 hrileng darh zel loh nana sawrkarin inkhuahkhirhna a siamte chu khauh taka kenkawh a ni a. Khawzawl khawpui chhungah Executive Duty team 10 (sawm) awmin, heng ah hian sawrkar hnathawk a bika ruat bakah VLTF leh Police te an tel a ni. April 21st, 2021 atanga May 2nd, 2021 thlenga Executive Duty leh Police ten Covid-19 dan bawhchhia an man tawh zat chu mi 187 niin, pawisa chawitir zat tlingkhawm hi Rs. 30,200/- a tling tawh a ni. Hengte hi vantlang hmuna mask vuah lo bakah curfew dan bawhchhia te, dan lova ramri kan te, inkhunghran laia dan zawm lo leh a dangte an ni.
Meeting-ah hian Executive Team leader te bakah DC office-a officer te, Superintendent of Police leh Khawzawl khawpui chhunga VLTF aiawh te an tel a ni.
Written by H. Lalramenga, SDC, Khawzawl District
