Khawzawl the 16th June, 2022: YMA Day vawi 87-na chu Mizoram hmun dang  rualin Khawzawl-ah pawh khaw hrang hrang ah hman a ni a. Sialhaw, Khawhai leh Khawzawl Darngawn venga YMA Day lawmna inkhawm chu Khawzawl District Bawrhsap Pu C.C. Lalchhuangkima chuan khuallian niin a hmanpui a ni. 

 

YMA Day lawmna inkhawm buatsaihah thusawiin, khuallian Pu C.C. Lalchhuangkima chuan ruihhlo chu hnam hmelma a nih thu leh thalaite chu ruihhlo laka fihlim turin a sawm a. Thalaite chu taima tur leh hnathawh zak lo turin a sawm a ni. Hnathawh kawr nen a ‘selfie’ chu zahthlak loh mai ni lovin, a ropui zawk thu a sawi. YMA chu pawl thianghlim leh ropui tak a nih thu sawiin, mi thenkhat avangin pawl pumpuin dem leh beih hi a dik lo a ni, a ti. Thalaite chu ram leh hnam humhalh kawngah theih tawp chhuah thin turin a sawm a ni.

 

Chawhma dar 10:00 ah Sialhawk Community Hall ah YMA Day lawman inkhawm hi hman a ni a. Pu V.L. Lampuia, Br. President in inkhawm hi a kaihruai a, Pu RS Lalrinsanga, CEC, Central YMA chuan inkhawm hi a  hmanpui bawk a ni.  Sub Hq. YMA leh Tuichangral North Group YMA atangin thusawi ngaihthlak a ni a. Member thite sunna hun neih niin, khawhar hla hmangin intihsiakna neih a ni bawk. 

 

Chawhnu dar 1:00 ah Khawhai Town Hall ah inkhawm hi buatsaih a ni a. Pu Lalhriatkima Chhangte, Br Asst Secretary in inkhawm hi a kaihruai a, section hrang hrang atangin zaithiamten zaiin mipui an awi a ni. 

 

Zanah dar 8:30 ah Darngawn Branch YMA Hall ah YMA Day lawmna inkhawm buatsaih a ni a. Pu Vanlalzara, Br president in inkhawm hi a kaihruia. Member thite sunna neih a ni a, YMA Day puala intihsiakna result puan a ni a, zirlai titha te chawimawina hun hman a ni bawk.