Khawzawl, dated 16th December 2025: Vawiin chawhnu dar 1 ah khan Khawzawl DC Auditorium ah District-Level Camp on Depositor Education and Awareness Fund (DEA Fund) neih a ni a, he hunah hian RBI leh Khawzawl Branch Bank hrang hrang a Manager te leh NGO leh YMA leh Village Council te nen hun hman niin Khawzawl Bawrhsap Pu K. Vanlalthiana'n he campaign hi a hawng a ni.
Khawzawl Bawrhsap Pu K. Vanlalthiana chuan he campaign chu mipui te tan a nih thu sawiin Bank lama an pawisa awm an hriat tawh lem silo chu RBI lam te'n an hriatpuiin an laklet theihna tur kawng an hawn sak chu tha a tih thu a sawi a. He campaign kal tlang hian mipui a tam zawk te'n an pawisa bank-a awm lakletna chang an hriat a an hlawkpui ngei a beisei thu sawiin he District-Level Camp on Depositor Education and Awareness Fund (DEA Fund) chu a hawng a ni.
Khawzawlah hian kum 10 chuang mahni bank account khawih che tawhlo mi 3000 chuang an awm a, pawisa claim tur tling khawm hi cheng nuai li (₹4 lakhs) chuang a awm a ni. Heng account khawih che lo te hian an laklet theihna turin a theih ang ang a puih an ni dawn thu leh Khawzawl Branch a Bank hrang hrang te chu NGO, YMA leh VC te nen tang ho a account holder te chu zawn chhuaha an pawisa claim tur na kawng a hma lak ni se an ti a. RBI lam chuan mipui te pawisa chu a bo mai mai ai chuan a neitu te'n an laklet theih nan a hma lak zel a ni a, mipui zawng zawng in an hriat theih nan a he campaign hi kalpui a nih thu an sawi a ni.
Department of Financial Services, Government of India kaihhruaina hnuaiah “Your Money, Your Rights” public awareness campaign kaltlangin Mizoram state pumah Depositor Education and Awareness Fund (DEA Fund) chungchangah district-level awareness leh assistance camp buatsaih a ni. Heng camp te hi district hrang hrangah 31st December 2025 thleng neih chhunzawm zel a ni ang.
Heng camp-te hi District Collector kaihhruaina hnuaiah leh State Level Bankers’ Committee (SLBC), Mizoram kaihhruaina hnuaiah District tin Lead Bank-in a buatsaih a, he programme-ah hian bank hrang hrang, insurance company, pension department, Securities and Exchange Board of India (SEBI), leh Investor Education and Protection Fund (IEPF) an tel a ni.
He hmalakna hmang hian State Level Bankers’ Committee, Mizoram chuan mipuite hnena an deposit leh investment dikna chungchangah awareness siam a, awlsam taka sum leh pai lama hamthatna dik tak an dawn theihna tura hmalak a tum thu a sawi nawn leh a ni.
