Khawzawl, the 20th January, 2021: 

Khawzawl Additional Deputy Commissioner Pu Lalrohlua chuan vawiin chawhma dar 11:00 ah khan DC Office Conference Hall, Khawzawl-ah Special Summary Revision of Photo Electoral Roll, 2021 kal mekah 22-Tuichang Assembly Constituency tan Final Electoral Roll a tlangzarh. Vawiina Final Electoral Roll tlangzarhna-ah hian Election officials, Khawzawl Joint VC, Khawzawl Group YMA, MUP, MHIP Sub-Headquarter aiawhte bakah political party aiawhte an tel a ni.

Khawzawl Additional DC Pu Lalrohlua chuan Khawzawl District a pian hnuah Village Council inthlana hman tur Electoral Roll publish a lo ni tawh a, Election Commission of India hnuaiah bik chuan tun tum hi Final Electoral Roll tlangzarh hmasak ber a nih avangin ni chhinchhiah tlak tak a nih thu a sawi a. Electoral Roll felfai tak tlangzarh a nih theih nana thawktu ERO, AERO leh Khawzawl District Election Branch-a thawktute chungah lawmthu a sawi bawk a ni. 

Election Officer Pu H. Lalramenga’n Special Summary Revision, 2021 ah Khawzawl District Election Officer chuan 22-Tuichang Assembly Constituency chauh a enkawl avangin District chhunga khaw thenkhat chu District dang DEO kutah a awm tih a tarlang a. Draft Electoral Roll tlangzarh atanga Final Electoral Roll tlangzarh thlenga Electoral Roll Revision kalphung leh, Final Roll chungchanga hriattur pawimawh tlangpuite a sawifiah zui a ni.

22-Tuichang AC Final Roll-ah voter mipa 8500 leh hmeichhia 8471, an vaiin 16971 an awm mek a, heng zinga a zatve aia tam (9754 (58%)) chu kum 40 hnuailam an ni. Roll Revision chhungin vote nei thar leh constituency dang atanga rawn insawn mi 631 te thunbelh niin, chhan hrang hrang vangin mi 309 te chu E/Roll atanga paih an ni thung a, Draft Roll aia Final Roll-a voter tamna hi 322 a ni. Punna zat hi za zelah 1.9 a ni bawk. 

Tuichang Assembly Constituency chhungah hian ah Part 28 awmin, Voter 1009 awmna Khawzawl Vengthar  North chu voter tamna ber a ni a. Urban Area (Khawzawl Town leh Khawhai) ah vote 9,865 (58.13%) awmin, Rural Area -a khaw 13 ah voter 7,106 (41.87%) an awm a ni. 


Written by H. Lalramenga, SDC, Khawzawl District