Khawzawl 23rd. June, 2022 : Vawiin chawhma dar 10:30 khan Khawzawl DC Conference Hall-ah Khawzawl District Bawrhsap C.C. Lalchhuangkima hovin Khawzawl leh Aizawl inkar Sumo Service tha zawk a awm theih dan tur sawihovin Meeting neih a ni a, Meeting-ah hian SP, Addl. DC, DTO,Khawzawl Maxi Cab Owners Association hruaitute, Mizoram Consumers Union hruaitute, Sub-Hqrs. YMA hruaitute leh Khawzawl Joint VC hruaitute an tel a ni.

Meeting-ah hian Khawzawl District Bawrhsap Pu C.C. Lalchhuangkima chuan COVID-19 hripui leng vangin hun rei tak Sumo a Service mumal thei lova, mipui lamah pawh zin veivak an tlem hle thin a. Tunah chuan hripui leng alo ziaawm tak avangin Sumo neitute leh Counter enkawltuten tan an lak thar a ngai dawn tih sawiin Sumo Service chungchangah mipui atanga lungawi lohna hriat tur awm fo thin chu pawi a tih thu a sawi a. Mipui zawng zawng tih lawm vek theih ni lo mahse theihtawp erawh chhuah turin an inbeisei tih a sawi a ni.

Meeting chuan mipuiten an chhawr tangkai zawk theihna turin Passenger te lamna tur Point hmun laili leh pan nuam deuh zawkah siam nise tiin hemi chungchang hi Khawzawl Sumo Welfare in buaipui turin dah a ni a. Hei bakah hian Sumo Service chungchanga mipui ten lungawi lohna an thlen hrang hrangte tarlangin a chin fel dan turte an sawiho bawk a ni.