Khawzawl, the 27th October, 2021:

Vawiin chawhma dar 11:00 khan Town Hall, Khawhaiah Khawzawl District Election Office, Electoral Literacy Club (ELC) leh Department of Political Science, Government Khawzawl College te tangkawp chuan Khawhai Higher Secondary School zirlaite tan Election kaihhnawih Awareness Campaign an buatsaih a, he hun hi Khawzawl District Bawrhsap Pu C.C. Lalchhuangkima, District Election Officer ni bawk chuan khuallian niin a hmanpui.


Pi Lalthlamuani, Associate Professor and Head of Political Science Department, Govt. Khawzawl College kaihhruai awareness campaign-ah hian Bawrhsap Pu C.C. Lalchhuangkima chuan thu sawiin, Election chu democracy lungphum pawimawh tak a ni a, kan aiawha roreltu tur thlanna a nih avangin ngaihtuahna mumal leh rilru fim tak hman a ngai a ni, a ti a. India rama Election kalphung chu rintlak leh belhchian dawl, khawvel ramdangte pawhin an entawn a nih thu a sawi. Election chu a pawimawh ang aiin mipui nawlpui zingah Election kalphung hriatna a thuk tawk lo thin a, chu chuan thu lengvak leh belhchian dawl lo a tihluar tih sawiin, rilru inhawng taka resource person te thusawi ngaithla turin Khawhai HSS zirlaite chu a chah bawk a ni. 

Pu H. Lalramenga, Election Officer pawhin thu sawiin, India khua leh tui, kum 18 tling tawhte chuan awmnghehna hmun (Ordinary resident an nihna hmun) ah vote an nei thei a ni, a ti a. Electoral Roll-a inziahluh chu kan aiawha rorel turte thlang a, ram inrelbawlnaa tel theihna pawimawh tak, India khua leh tui nihna anga kan chanvo leh mawhphurhna a ni tih a sawi. India rama Election chungchanga thuneitu (machinery) hrang hrangte hnathawh dan leh, Voter ID neih pawimawhna te a tarlang bawk a ni. 


Awareness Campaign-ah hian Khawhai HSS zirlaite chuan kum 18 an tlin hunah Electoral Roll-a inziaklut ngei tura intiamna an ziak a. Pu K. Lalkulhpuia, ELC Nodal Officer & Assistant Professor, Govt. Khawzawl College in inhmelhriattirna hun hmangin, Khawhai VCP Pu Daksiamliana’n kalkhawmte lawmna thu a sawi a. Pi Lalhmingsangi, Asst. Professor, Political Science Department, Govt. Khawzawl College leh Tv Zothanmawia, ELC President leh Pu K. Lalrammuana, Khawhai-I BLO ten Election kaihhnawih inzirtirna thu sawiin, Pu Lalremmawia, Khawhai-II BLO in lawmthu sawiin campaign a khar a ni.

Electoral Literacy Club hi September ni 27, 2021 khan Govt. Khawzawl College-ah din niin, October ni 5, 2021 khan Govt. Khawzawl College-ah “Electoral Literacy and Participation” tih thupui hmangin National Seminar a lo buatsaih tawh a, tunah hian member 80 chuang an awm mek a ni. 

Vawiina Awareness Campaign-ah hian Khawzawl District Election Branch a thawk te, Govt. Khawzawl College-a ELC leh Political Science Department zirlai te, Khawhai HSS zirtirtu leh zirlai naupangte an tel bawk. 


Written by: H. Lalramenga, SDC, Khawzawl District