Khawzawl, the 16^th December, 2021:

Vawiin chawhnu dar 1:30 khan Pu C.C. Lalchhuangkima, Deputy Commissioner kaihhruaiin Khawzawl District Disaster Management Authority (DDMA) an thukhawm a, Covid-19 hrilengin pun lam a pan zel avangin District Headquarters huam chhungah kumthar leh krismas vuakvetah inkhawmnaa zai leh ruaitheh loh nise tiin an rel. Meeting-ah hian DDMA member-te bakah Khawzawl Town chhunga Village Level Task Force (VLTF) aiawhte an tel a ni.

Khawzawl DC Pu C.C. Lalchhuangkima chuan tunhnaiah Khawzawl District, a bik takin District Headquarters-ah Covid-19 positive an pung nasa hle tih a sawi a. Khawzawl District chuan India ramah positivity rate sang ber (26.2%) dinhmun a hauh mek a, Central atanga Covid-19 dinhmun endiktu Team pawh an rawn kal phah hial tih a tarlang. Hunpui – Krismas leh Kumthar – lo thleng mai turah Covid-19 hrileng a pun nasat chhunzawm loh nana hmalak dan tur sawiho tura meeting koh a nih thu a sawi bawk a ni. 

Meeting-ah hian VLTF aiawhten an veng chhunga Covid-19 hrileng dinhmun theuh report an pe a. Kan hmalawka Krismas leh Kumthar lo thleng turah Covid-19 hrileng a pun nasat chhunzawm loh nan District Headquarters bikah chuan hemi puala ruaitheh khap nise tiin meeting chuan a rel. Pathian biak inkhawm chu Pathianni leh ni pawimawh bik ah te chhunlamah chauh neih nise, heng inkhawmahte hian zai phal loh nise tiin a rel bawk. Biakin-a inkhawm bak chu Kohhran programme dang heng - fellowship, lengkhawm zai, kohhran naupang leh thalai programme etc. te huaihawt loh tur a ni. 

DDMA leh VLTF aiawhte meeting chuan Biakin-a inkhawm bak chu District Headquarters-ah mipui nawlpui punkhawmna lam chi reng reng programme huaihawt phal loh nise tiin a rel a. Picnic spot, public park te pawh hawn phal a ni dawn lo a ni. Tin, hunpui vuakvet-a mipuite kan lo him zawk nan leh, Covid-19 hrileng darh zel tur venna atan ni 20.12.2021 atanga ni 26.12.2021 chhung chu “Vehicle No Tolerance Week” ah puan nise tiin rel a ni bawk a ni.

Written by H. Lalramenga, SDC, Khawzawl District