Khawzawl 10th. June, 2022 : Vawiin chawhma dar 10:30 khan Green Mizoram Day pualin Khawzawl DC Office Complex-ah programme buatsaih a ni a, he hun hi Khawzawl Wildlife Division DFO Pi Lawmnapari'n kaihruaiin District Bawrhsap Pu C.C. Lalchhuangkima chu khuallian a ni.

Thu sawiin District Bawrhsap chuan, Green Mizoram Day hi June ni 11 ni mahse remchan zawkna avangin vawiinah hemi pual hian hun hman a ni ta zawk tih a sawi a. Helipad leh a chhehvelahte nikum lamah Green Mizoram Day pual hian thingphun ni tawh mahse thingphunte kuminah hmuh tur mumal a awm tawh loh avangin, Dy. C.M. Pu Tawnluia'n a duh angin heng lai hmunah hian thingphun a, ngaw siam tum a nih thu a sawi a, heng lai hmunte hi sam fai a nih tawh thu leh thingphun thi tawhte pawh phun that leh a ni tih a sawi.

Pu C.C. Lalchhuangkima chuan Green Mizoram Day-a lo thlen hian thingphun ringawt duh tawk lovin a kar lakah enkawl a tul tih a sawi a. Kumin Green Mizoram Day-a thing kan phun a, nakum Green Mizoram Day-ah chauh kan buaipui leh dawn a nih chuan hemi inkarah thingphun thamral a awm leh dawn niin a lang a ti a. Vawiina thingphunte hi a phuntu Department ten September thlaah tihfai hnatlang neih leh a rawt a. Forest Department lam tihdanah chuan thingphun tawh enkawl dan hi kumkhatnaah chuan thlawhfai hun vawikhatna chu July thlaah a ni a, a vawihnihna chu September thlaah a ni ang a, a vawithumna chu November-ah a ni ang, a ti. 

Pu C.C. Lalchhuangkima chuan ramngaw pawimawhnate pawh sawiin, ngaw hi kan thiah zel chuan a tawpah mihring hian kan tuar dawn a ni a ti a. Ramngaw kan thiah zel vangin Mizoram-ah pawh khua a lum tial tial a, Khawzawlah pawh hian tunhma kan chin ngai loh, rah thei lo tura kan ngaihte pawh a rah theih tawh a ni, a ti a. Mizoram hrim hrim hi India ram pum huap pawhin ramngaw tichereu nasa berte zingami kan ni tih sawiin, kan thingtlang lo neih vang ni lova ramngaw tih kan hrim hrim te hi a tam hle thin a ni, a ti bawk.

Bawrhsap chuan sawi chhunzawmin, Mizoram Map han en pawhin ramngaw nei mumal kan awm tawh lova, tuna Forest Department in Wildlife Sanctuary tura an tihho, Forest Reserve an lo neih ho hi ngaw kan neih that chu an ni deuh mai a. VC pawh hian thingtlang khaw hrang hrangah Reserve kan nei mumal thei tawh lo a, hmun thenkhatah phei chuan VC leh Reserve nektute kan intibuai a ni, a ti a. Forest Reserve leh ngawte hi midang tan a ni lova, kan zavai atan, keimahni tan, kan tu leh fate tan, thang leh thar lo awm zel turte tan a ni a ti a. Mi changkang leh mifing, a ngaihna hria chuan thingphun an uar zel a, thingphun nasa turin an inzirtir a, keini pawh hi chutiang tur chuan thangtharte bulah te, Department-ah te, Whatsapp Group hrang hrangah te, Social Media-ah te kan theihna hmun hmunah sawi uar zel ila, Forest Department lam pawhin thingphun thatzia leh ramngaw pawimawhnate Social Media kaltlangin thehdarh uar sauh sauh se a duh thu a sawi bawk.

District Bawrhsap in thu a sawi zawh hian DFO Pi Lawmnapari kaihhruainain Fire Prevention Week, 2022 puala Kangmei veng tha khua thlanna leh Zirlaite tana Essay Competition buatsaiha lawmman dawngtute hnenah lawmman sem chhuah a ni a, lawmman dawngtute chu :-

High School Level Essay Competition:

Pakhatna : C. Lalrinngheti, Khawzawl Dinthar veng

Pahnihna : Lallawmzuali Renthlei, Khualen

Pathumna : Lalngilneii, Khualen

Consolation Prize : Lalrempuii, Khualen & Barnaba Lalhmangaihsanga, Rabung

Higher Secondary & College Level Essay Competition:

Pakhatna : PC. Lalremruatsaki, Pachhunga University College (4th. Semester)

Pahnihna : Lalchhanhimi, Govt. Khawzawl College (4th. Semester)

Pathumna : Lalhmingmawia, Govt. Khawzawl College (4th. Semester)

Kangmei Veng tha khua te :

Pakhatna : Khawzawl Darngawn (Certificate + Rs.50,000)

Pahnihna : Chawngtlai (Certificate + Rs.30,000)

Pathumna : Chhawrtui (Certificate + Rs.20,000)

Consolation Prize : Tualpui, Khawzawl Zaingen, Vangtlang

Heng bakah hian Mahatma Gandhi National Council of Rural Education in District Green Champion atana a thlan, Govt. Khawzawl College hnenah MGNCRE aiawhin District Bawrhsap-in Certificate a hlan bawk a ni.

Green Mizoram Day puala inkhawm buatsaih zawh hian DC Bangla Compound chhungah Khawzawl khawpui chhunga Sawrkar Department hrang hrangte leh NGO te bakah MJA ten thingphun hnatlang an nei zui a ni.

Green Mizoram Day pual hian Govt. Khawzawl College NSS te pawhin vawiin khan College Compound chhungah thing tiak 62 an phun ve bawk.