Khawzawl 26th. May, 2022 : Vawiin chawhma dar 11:00 khan Green Mizoram Day Committee, Khawzawl District chu an Chairman District Bawrhsap Pu C.C. Lalchhuangkima hovin DC Conference Hall-ah an thukhawm a, Meeting chuan Green Mizoram Day pual hian Khawzawl Sub-Hqrs. YMA huamchhunga YMA Branch hrang hrangte chu an Branch huamchhunga Tuikhur hnarah te thingphun a, thingphun belh ngai lote pawh thing awmsa te uluk taka enkawl zui tura ngen nise tiin an rel a. Khawzawl khaw tuilakna pakhat Damdiai lui hnarah thing tiak phun turin Chawngtlai Br. YMA leh Tualte Br. YMA te pawh ngen nise tiin an rel a ni.

Meeting-ah hian DFO (Wildlife Division) Pu Samson Thanruma chuan Green Mizoram Day 2021 hman dan leh hemi pual a Mualvawm Park huamchhunga thinphun dan te tarlangin nikum khan Green Mizoram Day pualin Mualvawm Park huamchhungah hian thing tiak 53 phun a ni a, heng zinga 38 chu a nung a, Mualvawm Park-ah hian kuminah pawh thingphun belh leh nise tiin an rel a ni. Nikum khan Khawzawl District chhungah hian Green Mizoram Day pualin Sawrkar Department, NGO leh mimal ten thing tiak 9,335 zet an phun a. Nikum a an thing tiak phun nun dan hi Sawrkar Department leh NGO ten Forest Department hnenah Report nise an ti a. Kuminah pawh hian Green Mizoram Day puala thingphun duh Sawrkar Department leh NGO te chu thla thar June ni 10 hma ngeiin Forest Department-ah in Report nise tiin an rel a ni.

Kumin Green Mizoram Day, June ni 11 hi Inrinni anih avangin June ni 10, 2022, Zirtawpni-ah Khawzawl DC Complex-ah he ni pual hian Programme hman a ni zawk dawn a. Hetah hian D.C. Pu C.C. Lalchhuangkima chu khuallian a ni ang a, he hunah hian kangmei chhuak tur ven kawnga hmala tha khua te hnenah leh kangmei ven kaihhnawih a High School leh Higher Secondary School zirlaite tana Essay inziahsiak buatsaih a ti thate hnenah lawmman sem a ni dawn a. Hun hman zawhah D.C. Bangla Compound-ah thingphun a ni dawn a, thingphun turte hi Forest Department in an lo buaipui dawn a ni.