Khawzawl the 8th February, 2022
Vawiin chawhma dar 11:00 khan Khawzawl Zaingen YMA hall-ah District Level Committee on Fire Prevention (DLCFP) huaihawtin Kangmei Ven Hapta hawnna neih a ni a, District Bawrhsap Pu C.C.Lalchhuangkima'n khualian niin a hmanpui.
Fire Prevention Week 2022 hawnna inkhawm Khawzawl District Village Council Association President Pu Lalfakzuala kaihhruaiah hian District Bawrhsap Pu C.C. Lalchhuangkima chuan thu sawiin, kangmei chhuahna chhan hi keimhni ngei kan nih thin avangin kan fimkhur a tul a, VC leh Tlawmngai pawl ten thahnem ngai taka hma an lak a ngai a ti a. Tunlai kangmei chhuah duh hun lai a nih avangin fimkhur a pawimawh tih sawiin Kangmei hian tumah a thliar lova, kangmei vanga chhiatna kan tawh loh nan mimal, tlawmngai pawl leh VC te kohhran thleng pawhin kan pawimawh tiin kangmei lakah Khawzawl district a fihlim theih nan tanrual puiah a sawm a ni.
Khuallian chuan ram kang tur laka fimkhur a pawi mawimawh tih sawiin March ni 15 hmaa lo hal tur order sorkarin a tih chhuah chu tha taka zawm kawngah VC leh YMA te an pawimawh a. Mahni khua leh veng theuhah tha taka sorkar thupek kengkawh tur leh kangmei tichhuak lo turin meilam tha taka sial turin a chah a. Mi thenkhat fimkhur loh vanga chhiatna nasa zawk a thlen loh nan fimkhur tura mipuite zirtir kawnga tan la tur te, kangmei ven kawnga tha taka hmalak chu mahni tan a ni tih hriaa lawmman la thei tura tan la turin kal khawmte a chah a ni.
Pu C Lalthankima DFO (Wildlife), Khawzawl Wildlife Division pawhin thu sawiin Mizoram hi tlangram lo neia eizawng kan nih avangin kum tin ram kan vat a, hei hian ram kang nasa tak siam a ni, a ti a. Ramkang tih reh a nih theihna tura sorkar hmalak dan te, hemi atana sorkarin committee a din dan te, ramkang ven kawnga hma la tha lawmman siam chhoh a nih dan te, Khawzawl district chhunga kangmei ven kawnga hmalak dante a tar lang a ni. Khawzawl DFO chuan, nikum 2021 chhung khan Khawzawl district-ah kangmei tum 25 a chhuak tih sawiin ram 95 hactare a kang a, in kang khawzawl district ah 2 a awm tih a sawi bawk a. Kangmei ven kawnga department hma lak dante a tarlang a ni.
He hunah hian Khawzawl SP Pu PC Lalchunglura chuan kangmei chhuak tur laka inven a pawimawhna leh inven dan chungchang powerpoint presentation a pe a. Pu V. Lalzamvela SDO P&E Department pawhin electric avanga kangmei chhuah theih dan te leh fimkhurna tur thil hrang a sawi. Pu Lalrohlua, Additional DC chuan lawmthu sawina hun a nei bawk a ni.
Kangmei Ven Hapta inkhawmah hian Khawzawl khawpui chhunga sorkar department hrang hrang hotu te leh Khawzawl district chhunga VC hrang hrang aiawh leh NGO aiawh te an tel a ni.
Written by H. Lalramenga, SDC, Khawzawl District
