Dated Khawzawl, the 11th December, 2020:

Khawzawl District chhunga Special Summary Revision of Electoral Roll, 2021 kalpui mek endik tura Election Commission of India (ECI)-in a ruat, Electoral Roll Observer R. Zarzosanga, IAS chuan vawiin khan Khawzawl a tlawh a. Election Official leh political party hrang hrang aiawhte chu Khawzawl DC Conference Hall-ah Special Summary Revision of Photo Electoral Roll, 2021 kalpui mek chungchang a sawipui.

Electoral Roll Observer Pu R.Zarzosanga chuan Special Summary of Photo Electoral Roll 2021 kalpui mek tluang leh felfai taka kalpui anih theihna tura enfiah tura ECI in a ruatna bawhzui a nih thu sawiin, zawhna nei leh rawtna thlen duh neite tan a inhawn reng thu a sawi a.  Electoral Roll hrisel leh felfai tak neih anih theihna turin ECI in theihtawp chhuaha tan a lak thin thu sawiin, Electoral Roll felfai leh hrisel neih theihna kawngah Political party leh NGO te tawiawmna a pawimawh thu a sawi a. Inrawnkhawmna hun ngaipawimawha kal political party aiawhte chungah lawmthu a sawi a ni.


District Election Officer (DEO) Pu Zothanmawia, Khawzawl Bawrhsap chuan Khawzawl District chhungah Special Summary Revision of Photo Electoral Roll fimkhur leh uluk taka kalpui a nih thu sawiin, Khawzawl District chu District thar a nih angin Election staff te pawhin ERO-Net hman dan leh tuldangah Champhai DEO hnuaiah training an nei tih a sawi a. Electoral Roll Revision a hman turin printer thar leh thil dang neih belh a ni a, Election Branch mai bakah District Administration pawh a changtlung chho zel a ni tih kalkhawmte a hrilh. Khawzawl chu District lian tak a nih loh avangin thil ruahmantu tan pawh a awlsam phah a, Special Summary Revision pawh tluang takin, a hun taka zo thei turin kalpui mek a ni tih a sawi a ni. 


He hunah hian Pu H. Lalramenga, Election Officer, Khawzawl District chuan Special Summary Revision of Photo Electoral Roll kalpui meka hriat tur pawimawh leh hmabak awmte a sawifiah a. Special Summary Revision-ah hian Khawzawl DEO hnuaiah 22-Tuichang Assembly Constituency awmin, DEO leh Electoral Registration Officer (ERO) pakhat ve ve awmin, Assistant ERO pahnih an awm a. Draft Electoral Roll-a a lan danin voter awm zat hi mipa 8356, hmeichhia 8293, an vain mi 16649 an ni a. Special Summary Revision kaihhnawihah hian Polling station pahnih hawn belh niin, tun dinhmunah Polling Station/Part 28 a awm mek a ni. Dilna lutte chak zawka chinfel anih theihna turin a theih chinah hearing neiha chinfel  nghal zel anih thu pawh tarlangin, tun dinhmunah form 6 kaltlangin lut thar tur dilna 173, form 7 hmangin paih dilna 56, form 8 kaltlangin siamthat dilna 49 leh form 8 A hmangin insawn dilna (Constituency khat chhungah) 11 lutte chinfel tawh a ni,  a ti a. Mipui, a bikin thalai zingah Electoral Roll a inthun pawimawhzia inzirtir nan hemi lam hawi Slogan inphuahsiak leh, poster siama thehdarh te kalpui a ni tih a sawi bawk.

Special Summary Revision of Photo Electoral Roll 2021 atan  hian qualifying date chu January Ni 1, 2021 a ni a, hemi ni a Kum 18 tling hman tur India khua leh tui (citizen) dik takte chuan Electoral Roll-ah luh an dil thei ang. Hemi rual hian siam that ngai siam, paih ngai paih leh insawn duhte siam fel theihna hun pawh hawn reng a ni. Special Summary Revision of Photo E/Roll 2021 hnuaiah November Ni 16, 2020 atanga tanin December  Ni 15, 2020 thleng  hian Claims and Objection hun; Electoral Roll-a inthun, paih, insawn leh siam that,  dilna thehluh theih hun hawn mek a ni a. Ruahman dan chuan dilna lutte January  Ni 10, 2021 hmain chinfel vek hman tum a ni a. January Ni 14, 2021 atangin database-te siam that leh supplement-te chhutchhuah vek hman tum a ni a, Electoral Roll siam that leh a thar ber ni tur chu January Ni 20, 2021 ah tlangzarh tum a ni.


Written by H. Lalramenga, SDC, Khawzawl District