Lok Sabha Inthlanpui puala buatsaih District Level SVEEP & Media Competition ah Khawzawl District Election Officer (DEO) Office chu Mizoram District 11 zingah titha bera thlan a ni. Vawiin khan lawmman semna hun hi Aijal Club-ah neih a ni a. Khawzawl DEO aiawhin Pu Elijah LH Sanga, SDC, Nodal Officer, SVEEP leh Pu Lalchhuanawma Ralte, DIPRO, Asst Nodal Officer, SVEEP ten lawmman hi an dawng a ni. Lawmman hian thuziak, pawisa fai cheng 30,000 leh pangpar mawi tak a keng tel.

He inelna hi Chief Electoral Officer (CEO) Office buatsaih a ni a. Vote thlak tura sawmna leh voter te hnena an chanvo zirtirna media kaltlanga District hrang hrang ten an neih dan chu uluk taka endik a nih hnuah lawmman pakhatna dawng turin Khawzawl District hi thlan an ni ta a ni.

Pu Elijah LH Sanga, Nodal Officer chuan hlawhtling taka SVEEP hmalakna neih a nih theih nan a thlawptu DEO Pu K. Lalrohlua, Dy DEO Pu Lalfakzuala te bakah DEO hnuaia Officer leh Staff te zawng zawng chungah lawmthu a sawi a. District chhunga mi hriat hlawh - Zirsangpuii, Youngfellla, Mendal, Rebecca Zothanpuii ten tha taka an thlawp avang leh District mipui ten phur taka vote an thlak avangin lawmthu a sawi bawk a ni.