Khawzawl, the 24th May, 2022: Khawzawl District Level SEDP Committee chu DC Conference Hall, Khawzawl ah Pu C.C. Lalchhuangkima, Deputy Commissioner kaihhruaiin thukhawmna an nei.  Pu C.C. Lalchhuangkima, Deputy Commissioner chuan SEDP beneficiaries tur thlan chungchangah remchan zawkna avangin Tuichang Assembly Constituency huamchhung chauh Khawzawl District Level SEDP Committee chuan an thlan tur thu leh beneficiaries hi mi 1500 an awm theih tur thu a sawi a. SEDP chu kuthnathawktute chawikanna tur Sawrkar Flagship programme a nih hre rengin, hlawhtling tak a kalpui a nih theih nan Khawzawl District chhung a department leh khawtlang hruaitute SEDP Committee member-a ruat te chu thawhhona tha tak hnuai a hmalak a tul thu a sawi.  

Pu Lalvenhima, Project Director, DRDA, Khawzawl chuan kalkhawmte chu an hriattur pawimawhte a hrilhfiah a, ‘SEDP – Family Oriented Programme’ kalpui tur a inkaihhruaina hrang hrang a sawizau bawk. Hei bakah hian beneficiary ni tura dilna ‘Form 1’ hman dan tur kalkhawmte hnenah a sawifiah a ni. Meeting ah hian Khawzawl District chhunga Tuichang A/C hnuaia khaw hrang hrangte atanga Village Level SEDP Committee-te tan June 2022 ral hma ngeiin training buatsaih an rel a, training-ah hian member-te hriattur pawimawhte in hrilhhriatna neih a ni ang.