Khawzawl, the 3rd June, 2021: Vawiin chawhma dar 11:00 khan District Level Committee on Green Mizoram, Khawzawl District chu an chairman Pu Zothanmawia, Deputy Commissioner, Khawzawl District kaihhruaina hnuaiah an thukhawm. 

Meeting tan hma in Pu Lalthankima, DFO, Khawzawl Wildlife Division chuan report a pe a. Kum 2020 Green Mizoram a thing phun 2248 zingah 1007 (44.8%) a nung a. Kuminah ruahtui a tlak har avangin thingphun nungsa engemaw zat a thi ni a hriat a nih thu a tarlang.

Vawiina meeting chuan kum 2021 Green Mizoram Day denchhenin ni 11.06.2021 (Friday) dar 10:30 a.m ah DC office kawtah programme hman nise tiin a rel a. He hunah hian kangmei venna -a titha khaw pathumte hnenah leh, Hla thu inphuahsiak a titha pathum (3) te hnenah lawmman pek nise tih a ni. Inaugural function neih zawhah DC Complex leh Mualvawm field velah Department hrang hrang, sub-headquarters YMA leh sub-headquarters MHIP atanga thingphun tura ruat bik ten Covid-19 SOP zawm chungin thingphunna hun neih nise tiin rel a ni bawk. Thing phunna hmunhma lo enfel tur te, a hungna tur mau leh thingphunna a leitha hman tur te lo ngaihtuah turin DFO, Khawzawl Wildlife Division chu ruat a ni a. Thingtiak phun tur te pawh inaugural functionah hian chhawp nghal vek nise tih a ni.

Green Mizoram Day puala Department hrang hrang leh mimal thingtiak phun duh te chuan Pu Lalremthanga, Range Officer, Khawzawl hnenah in report a thingtiak te pawh lak tur a ni a. Hetiang bawk hian R.O Kawlkulh, Khawhai leh Rabung te pawhin an area chhungah thingtiak lo sem/pekchhuah nise tih a ni bawk.

Written by H. Lalramenga, SDC, Khawzawl District