Khawzawl, the 9th August, 2022: State Election Commission thuchhuah angin Khawzawl District chhunga Sialhawk leh Aiduzawl khuaahte VC by-election neih tur a nih angin, hemi atana inpuahchahna kalzelah vawiin chawhnu dar 1:00 khan District Election Officer, Pu C.C. Lalchhuangkima chuan VC by-election neihna tur khuaa final electoral roll-te chu DC Conference Hall-ah a tlangzarh a, electoral roll tlangzarh tak chhutchhuah copy chu pollitical party aiawhte a hlan nghal a ni.
District Election Officer Pu C.C. Lalchhuangkima chuan VC by-election neihna tur khuate tan a hun takah final electoral roll tlangzarh a ni chu lawmawm tiin, hlawhtling taka kalpui a nih theihna kawnga buaipuia tawiawmtute fakawm a ti a. VLO ten an tih tur engkim tha takin an ti a, an inpekna leh thawhrimna a chhuanawm takzet a ni, a ti a. Polling Station-te endik leh enfiahna kan nei chho zel dawn a, chung hunah chuan theihtawp chhuaha kan thawhho zel a tul a ni, a ti bawk.
Vawiina final electoral roll tlangzarhin a tarlan dan chuan Sialhawk khuaah hian vote nei mi 1,691 an awm a; heng zinga 820 te hi mipa niin, 871 dangte chu hmeichhia an ni a. Hmeichhe vote nei hi 51 in an tam zawk a, draft electoral roll aiin vote nei mi 13 in an tam zawk a ni. VC electoral roll siamthatna neih fel hnuah Sialhawk khuaah hian vote nei thar mi 13 (Mipa 5 leh Hmeichhia 8) awmin electoral roll atanga paih an awm lo a ni.
Aiduzawl-ah hian vote nei mi 209 an awm a; heng zinga 106 te hi mipa niin, 103 te chu hmeichhia an ni a. Mipa vote nei hi 3 in an tam zawk a, draft electoral roll aiin vote nei mi 8 in an tlem zawk a ni. Vote nei thar mi 1 (Hmeichhia) awmin electoral roll atanga paih mi 9 (Mipa 2 leh Hmeichhia 7) an awm bawk.
Sialhawkah hian VC seat 5; General seat 4 leh Reserved seat 1 a awm a. General seat atanga tling VC member 1 boral avangin he seat ruak hi hnawhkhah a ngai a. Aiduzawl khuaah hian VC seat 3; General seat 2 leh Reserved seat 1 a awm a, General seat atanga tling VC member 1 boral avangin a hnawhkhat turin inthlanna buatsaih a tul ta a ni.
Attachment
