Khawzawl, the 26th April, 2023 : Vawiin chawhma dar 10:30 khan Khawzawl District Bawrhsap Pu K. Lalrohlua chuan MSSC - Tata Trusts Football Academy District Level PMJVK Football Tournament chu Mualvawm Field, Khawzawl-ah a hawng a, Tournament-ah hian Khawzawl, Kawlkulh leh Khawhai atangin MSSC Grassroot naupang te an tel a, Tournament hi tunkar Inrinni-ah zawhfel a ni dawn a ni.

He hunah hian khuallian District Bawrhsap Pu K. Lalrohlua chuan thu sawiin infiamna lamah hian Khawzawl hi kan vannei a, Artificial Grass pawh Sports & Youth Services Department tih buai ngai miah lovin Bialtu MLA, Deputy Chief Minister ni bawk Pu Tawnluia hmalakna zarah kan nei thei a, hei hi a ropui hle a ni a ti a. Khawzawl District chu District changkang, faina leh thianghlimna kawngah pawh Mizoram a hmahruaitu kan ni a, District chhunga Notified Town 3 - Khawzawl, Biate leh Khawhai te pawh khaw fai tak an ni vek a ni a ti. D.C. chuan fai hi changkanna a ni a ti a, infiammi naupangte pawh faina vawng nungtu nih bakah thing leh mau leh luidung humhalhtu, kan chhehvel a ramsa leh rannung te venghimtu ni tur a chahin an nu leh pa te pawh hetiang lamah hian zirtir thin zawk turin a fuih a. Football chu Mizote tuina, infiamna zingah Mizo thalaiten eizawnna atana an hman tammna ber Discipline a ni tih a sawi a, Grassroot naupang te pawh hlawhtlinna an neih chhoh theihna turin ei leh inah fimkhur tura chahin, Trainers te leh anmahni hmangaihtuten ei leh in tur an pek chauh ei a, in turin a chah bawk a ni.

He Football Tournament-ah hian Khawzawl Centre, Kawlkulh Centre leh Khawhai Centre a Grassroot naupangte chu an inkhel kual ang a, Point hmu tam ber Centre an Champion dawn a ni.