Khawzawl, the 23^rd September, 2021

Vawiin chawhnu dar 1:00 khan Pu C.C. Lalchhuangkima, Deputy Commissioner & Chairman, District Disaster Management Authority, Khawzawl District kaihhruaiin DC Office Conference Hall-ah District huamchhunga Branch YMA te Disaster chungchang inzirtirna video insiamsiak, result puan leh lawmman semna hun hman a ni a. Riangtlei Branch YMA in lirnghing chungchang inzirtirna video an siam chu pakhatna niin, pawisa fai Rs. 7,500 leh certificate an dawng a ni. 

Khawzawl District Bawrhsap Pu C.C. Lalchhuangkima chuan intihsiaknaa tel zawng zawngte chungah lawmthu sawiin, khuarel leh mihring thiltih vanga chhiatna chu engtiklai pawha thleng thut thei a nih avangin a lo hmachhawn dan mai bakah inrinlawk dan leh inven dan inzirtir tam a pawimawh a ni, a ti a. YMA chu chhiatna thlen changa chechhuak hmasa an nih thin avangin Disaster chungchanga inelna pawh YMA Branch hrang hrangte tan siam a nih thu a tarlang a, intihsiaknaa lawmman dawngtute hnenah certificate leh pawisa fai a hlan zui bawk a ni.

Pu H. Lalramenga, SDC, DM&R Nodal Officer chuan report pein, Mizoram Sawrkar, Disaster Management & Rehabilitation Department atanga Disaster Management kaihhnawiha hriatna leh theihna tipung tura a hranpaa sum dawn hmangin inelna buatsaih a ni tih a sawi a. Video rawn lutte chu Khawzawl DDMA in uluk taka endikin, chhiatrupna (Disaster) thleng thei laka lo inrinlawk dan leh lo hmachhawn dan inzirtirna thuchah (message) a nei tha em tih chu ngaihpawimawh a nih thu a tarlang bawk.

Disaster chungchang inzirtirna video insiamsiak hi minute 1 (khat) a rei a ni a. Khawzawl Kawnzar Branch YMA in tuilian vanga buaina thleng thei lo hmachhawn dan video an siam chu pahnihna niin, certificate leh pawisa fai Rs. 5,000 an dawng a. Khawzawl Arro Branch YMA leh Khawzawl Electric Veng Branch YMA ten lirnghing chungchang inzirtirna an siamte chu pathumnaah thlan niin, certificate leh pawisa fai Rs. 2,500 ve ve hlan an ni. 

Lawmman pakhatna atanga pathumna bakah hian Branch YMA titha dang panga heng – Biate, Khawhai, Khualen, Khawzawl Hermon leh Khawzawl Dinthar te hnenah certificate leh pawisa fai Rs. 1,000 theuh hlan a ni bawk a ni. 

Vawiina result puan leh lawmman semna hunah hian DDMA, Khawzawl District member-te bakah Pu K. Lalnunsanga, President, Sub-Headquarters YMA Khawzawl leh lawmman dawngtu Branch YMA te atangin aiawh pakhat theuh an tel a, intihsiaknaa lawmman dawngtute video thehluh hi thlirho nghal a ni bawk a ni.

Written by H. Lalramenga, SDC, Khawzawl District