Khawzawl 19th. May, 2022 : Khawzawl District Bawrhsap Pu C.C. Lalchhuangkima chuan vawiin chawhma dar 10:30 khan Inter-Department Sports 2022 chu Khawzawl Vengthar YMA Hall-ah a hawng a, Inter Department Sports 2022 hi Khawzawl Officer's Club bultuma buatsaih niin ni 2 chhung neih tur a ni.

KOC President Pu K. Ziona, Principal, Govt. Khawzawl College kaihhruaia Inter-Department Sports hawnna hun tawi buatsaihah Khawzawl District Bawrhsap Pu C.C. Lalchhuangkima chuan Khawzawl Officer's Club ten Inter-Department Sports an buatsaih chu lawmawm a tih thu a sawi a, he Sports hi Sawrkar hnathawkte an lo inpawh a, an inthianthat a, an inkawmngeihna tura buatsaih a ni tih sawiin Sawrkar hnathawk kalkhawmte chu Sports buatsaih a nih chhan hre reng turin a chah a. Intihsiakna hrang hrang an neih turah pawh dik tak leh fel taka thil ti tura chahin Sports a tel te chu hun tha tak hmang turin duhsakna a hlan nghal a ni.

Inter-Department Sports hawnnaah hian KOC Secretary Pu Lalnunenga, Account Officer, P&E Department, Khawzawl Division chuan KOC Member te inhmelhriattirna neiin tun dinhmunah KOC-ah hian Member 65 an awm mek tih a tarlang a. Pu Lalbiakzaua, Deputy Commandant, 2nd. I.R. Battalion in Sports a tel tur te chu Oath Taking a neihpui bawk a ni.

Inter-Department Sports-ah hian Sawrkar Department hrang hrang te chu Group 4 - Yellow Group, Blue Group, Red Group leh White Group-ah te inthenin, infiamna chi hrang hrang 12 hmangin heng Group te hi an intihsiak dawn a, vawiinah Indoor Games neiin naktukah Outdoor Games an nei dawn a ni. Tun Inter-Department Sports hi kum 2016 hnua KOC in Inter-Department Sports a buatsaih lehna hmasa ber a ni.